ᐊᒃᑐᐃᔾᔪᑕᐅᓯᒪᔪᑦ ᐃᓄᐃᑦ ᐃᓗᓯᖏᓐᓄᑦ

ᐃᓗᓯᖅ ᐋᓐᓂᐊᖃᖏᓐᓂᑐᐃᓐᓇᐅᙱᓚᖅ. ᐊᒥᓱᑦ ᐱᔾᔪᑎᐅᓯᒪᔪᑦ ᐊᒃᑐᐃᔾᔪᑕᐅᓯᒪᕗᑦ ᐃᓄᐃᑦ ᓄᓇᓖᓪᓗ ᐃᓗᓯᖏᓐᓄᑦ, ᐃᓚᒋᔭᐅᓪᓗᓂ ᑮᓇᐅᔭᓕᐅᕐᓂᖅ, ᐃᒡᓗᓕᕆᓂᖅ, ᐃᓕᓐᓂᐊᕐᓂᓕᕆᓂᖅ, ᐊᕙᑎ, ᐊᒻᒪᓗ ᓇᖕᒥᓂᖅ ᓇᓗᓇᐃᖅᓯᓂᖅ.

ᑖᒃᑯᐊ ᐱᔾᔪᑎᐅᔪᑦ ᓇᓗᓇᐃᖅᑕᐅᒐᔪᖃᑦᑕᖅᐳᑦ ‘ᐃᓗᓯᕐᒧᑦ ᓇᓗᓇᐃᖅᓯᔾᔪᑎᐅᓪᓗᑎᒃ’.

ᑖᒃᑯᐊ ᐱᔾᔪᑎᐅᓯᒪᔪᑦ ᕿᒥᕐᕈᔭᐅᔭᕌᖓᒥᒃ ᐃᓗᓯᕐᒧᑦ ᐃᒐᓛᒃᑯᑦ, ᑕᑯᕙᒃᐳᒍᑦ:

• ᐃᓄᐃᑦ ᓄᓇᒥᒃ ᖃᐅᔨᒪᓂᖃᑦᑎᐊᖅᐳᑦ. ᐃᓄᐃᑦ ᐊᕕᒃᑎᑕᐅᔪᓐᓇᙱᓚᑦ ᐊᕙᑎᒥᑦ ᓇᔪᕐᕕᒋᔭᖓᓂᑦ. ᐱᔾᔪᑎᒃᓴᐅᔪᑦ ᓲᕐᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᒻᒪᓗ ᐊᕙᑎᑦᑎᓐᓂ ᓱᕈᔪᓐᓇᖅᑐᑦ ᖁᕝᕙᓯᒃᑐᒻᒪᕆᒻᒥᒃ ᐃᓄᖕᓄᑦ ᐊᒃᑐᐃᔾᔭᐅᕙᓪᓕᐊᒻᒪᕆᒃᐳᑦ. ᓄᓇᕐᔪᐊᑉ ᐅᑭᐅᖅᑕᖅᑐᖏᓐᓂ ᓯᓚ ᐊᓯᔾᔨᕐᓂᖅᐹᖑᓂᐊᕐᓂᕋᖅᑕᐅᓯᒪᕗᖅ. ᑕᐃᒪᐃᒃᑲᓗᐊᖅᑎᓪᓗᒍ, ᐅᑭᐅᖅᑕᖅᑐᕐᒥᐅᑕᐅᔪᑦ, ᐃᓚᒋᔭᐅᓪᓗᓂ ᑲᓇᑕᐅᑉ ᐅᑭᐅᖅᑕᖅᑐᖓ, ᐱᓕᕆᔾᔪᑎᒃᓴᖃᙱᓚᑦ ᖃᓄᐃᑉᐸᓪᓕᐊᒻᒪᕆᒃᓯᒪᔪᓄᑦ.
• ᓈᒻᒪᙱᓗᐊᖅᑐᑦ ᐃᓄᒋᐊᓗᐊᖅᑐᓪᓗ ᐃᒡᓗᖃᕐᕕᐅᔪᑦ ᖁᕝᕙᓯᒃᑐᒻᒪᕆᒻᒥᒃ ᐊᓂᖅᑎᕆᔾᔪᑎᖏᓐᓄᑦ ᐃᓗᐊᖏᔾᔪᑎᖃᖃᑦᑕᖅᐳᑦ ᐊᒻᒪᓗ ᐋᓐᓂᖅᓯᕆᓂᖅᑕᖃᖃᑦᑕᕆᓪᓗᓂ ᐃᓄᐃᑦ ᓄᓇᓕᖏᓐᓂ. ᐳᕙᒡᓗᒃᐸᒃᑐᓪᓗ ᐃᓄᐃᑦ ᓄᓇᓕᖏᓐᓂ 70-ᓄᑦ ᐊᒥᓱᐊᖅᑎᕐᓂᕐᓴᐅᕗᑦ ᑲᓇᑕᒥᐅᑦ ᐊᑯᓪᓕᖅᐹᕆᔭᖏᓐᓂᑦ.[1]
• ᐃᓄᐃᑦ ᑭᖑᕙᖓᓂᕐᓴᐅᕗᑦ ᑲᓇᑕᒥᐅᔪᓂᑦ ᓲᕐᓗ ᖁᕝᕙᓯᖕᓂᖅᐹᒃᑯᑦ ᐃᓕᓐᓂᐊᖅᓯᒪᓂᕐᒥᒃ ᐊᒻᒪ ᐃᖅᑲᓇᐃᔭᖅᑐᓂᑦ ᐃᓚᐅᓂᕐᒧᑦ.
• ᖃᐅᔨᓴᖅᑕᐅᓯᒪᔪᒥ ᓂᕿᖃᑦᑎᐊᕆᐊᖃᕐᓂᕐᒧᑦ ᒥᒃᓵᓄᑦ ᑯᒑᔪᒃ, ᓄᓇᕗᒥ, ᑕᓪᓕᒪᑦ ᐊᕐᕕᓂᓕᐅᔪᓂᑦ ᐃᓄᐃᑦ ᐊᖏᕐᕋᕆᔭᖏᓐᓂ ᓇᓗᓇᐃᖅᑕᐅᓯᒪᕗᑦ ᓂᕆᔭᒃᓴᖃᑦᑎᐊᖃᑦᑕᖏᑦᑐᑦ. [2]

ᑐᑭᓯᐅᒪᔭᐅᑦᑎᐊᒃᑲᓐᓂᕆᐊᖃᓕᕐᓂᖓ

ᒫᓐᓇᐅᔪᒥ, ᓇᓗᓇᐃᔭᐅᑎᒃᓴᖅᑕᖃᓗᐊᙱᓚᖅ ᐃᓄᐃᑦ ᐃᓗᓯᖏᑕ ᖃᓄᐃᓕᖓᓂᕆᔭᖏᓐᓄᑦ. ᓇᓗᓇᐃᔭᐅᑎᑕᖃᕋᓂᓘᓐᓃᑦ ᐅᖃᐅᓯᖃᖅᑐᒥᒃ ᐃᓗᓯᕐᒧᑦ ᓇᓗᓇᐃᖅᓯᔾᔪᑎᐅᒃᑲᓐᓂᕋᔭᖅᑐᓂᒃ. ᐱᓕᕆᐊᖃᕆᐊᖃᒻᒪᕆᒃᐳᑦ ᐃᓄᖕᓂᒃ ᖃᓄᐃᓕᖓᓂᕆᔭᖏᓐᓄᑦ ᑐᑭᓯᐅᒪᓂᕐᓴᐅᒃᑲᓐᓂᕆᐊᖃᓕᕐᓂᖏᓐᓄᑦ. ᑕᐃᒪᐃᒃᑲᓗᐊᖅᑎᓪᓗᒍ, ᑕᒪᓐᓇ ᐱᓕᕆᐊᖑᔪᖅ ᐃᓕᓴᖅᓯᔭᕆᐊᖃᖅᐳᖅ ᐃᓄᐃᑦ ᐱᖅᑯᓯᖏᓐᓂᒃ ᐱᒻᒪᕆᐅᔪᖁᑎᖏᓐᓂᓪᓗ, ᐊᒻᒪᓗ ᐊᑑᑎᖃᑦᑎᐊᕈᓐᓇᕐᓗᑎᒃ ᓄᓇᓕᐅᑉ ᖁᕝᕙᓯᖕᓂᕆᔭᖓᓄᑦ.