ᐃᓄᐃᑦ ᐃᓗᓯᖏᓐᓂᒃ ᓇᓗᓇᐃᔭᐃᓂᖅ

ᓇᓗᓇᐃᔭᐃᓂᖅ ᐃᓄᐃᑦ ᐃᓗᓯᖓᓂᒃ ᖃᓄᐃᖏᑦᑎᐊᕐᓂᕐᒥᓪᓗ

ᖃᐅᔨᓴᕐᓂᖅ ᐃᓄᐃᑦ ᐃᓗᓯᖓᓂᒃ ᐱᒐᕐᓂᖅᑐᑯᓘᙱᓚᖅ. ᐅᓂᒃᑳᓕᐅᕐᓂᖅ ᐃᓗᓯᖅ ᐱᔾᔪᑎᒋᓪᓗᒍ ᐊᒃᓱᕈᓐᓇᕐᐳᖅ ᐱᔾᔪᑎᒋᓪᓗᒋᑦ ᐊᑕᖏᐅᒪᔪᒥᒃ ᐊᔾᔨᒌᓐᓂᕐᓯᐅᕈᑕᐅᔪᓐᓇᖅᑐᓂᓪᓗ ᑐᑭᓯᒋᐊᕈᑎᒃᓴᓂᒃ ᓇᓗᓇᐃᔭᐅᑎᓂᓪᓗ ᐱᑕᖃᖏᓐᓂᖓᓄᑦ. ᑕᒪᓐᓇ ᐊᑕᖏᐅᒪᖏᑦᑐᒥᒃ ᑕᑯᒃᓴᐅᓂᖃᓕᖅᑎᑦᑎᕙᒃᐳᖅ ᐃᓄᐃᑦ ᐃᓗᓯᖓᑕ ᖃᓄᐃᓕᖓᓂᕆᔭᖓᓂᒃ.

ᓱᓕ, ᐃᓗᓯᖅ ᓴᖅᑭᔮᙱᓚᖅ ᐱᔾᔪᑎᖃᖏᑦᑐᒥ. ᐃᓅᓰᑦ ᒪᑭᒪᐅᑏᓪᓗ ᖃᓄᐃᓕᖓᓂᕆᔭᖓ, ᐃᒡᓗᓕᕆᓂᖅ, ᐃᖅᑲᓇᐃᔭᖅᑐᓕᕆᓂᖅ, ᐃᓕᓐᓂᐊᖏᓐᓇᕈᓐᓇᕐᓂᖅ ᐊᓯᖏᓪᓗ ᐱᔾᔪᑎᐅᓯᒪᔪᑦ ᐊᒃᑐᐃᔾᔪᑕᐅᕙᒃᐳᑦ ᐃᓅᑉ ᐃᓗᓯᖓᓄᑦ ᖃᓄᐃᖏᑦᑎᐊᕆᐊᖃᕐᓂᖓᓄᑦ.

©ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᑐᔾᔨᖃᑎᒌᒃᑯᖏᓐᓂᑦ 2007

ᑐᑭᓯᒋᐊᕈᑎᒃᓴᖅ ᕿᒥᕐᕈᓪᓗᒍ ᑖᓐᓇ ᐊᑐᐃᓐᓇᐅᔪᖅ, ᖃᐅᔨᓯᒪᕗᒍᑦ ᐃᓄᐃᑦ ᐃᓗᓯᑦᑎᐊᕆᖏᓐᓂᕐᓴᐅᕙᖕᓂᖏᓐᓄᑦ ᑖᒃᑯᓇᙵᓪᓕ ᑲᓇᑕᒥᐅᓕᒫᓂᑦ. ᓲᕐᓗ:

• ᐃᓄᐃᑦ ᐊᕐᓇᓂᑦ ᐊᑯᓪᓕᖅᐹᖓᒍᑦ ᐃᓅᓂᕆᔭᐅᕙᒃᑐᖅ 14 ᐊᕐᕌᒍᓄᑦ ᑐ1ᓃᓐᓂᕐᓴᐅᕗᖅ ᑖᒃᑯᓇᓂᙵᓪᓕ ᑲᓇᑕᒥᐅᑕᐅᑉ ᐊᕐᓇᐅᑉ ᐊᑯᓪᓕᖅᐹᕆᔭᖓᒍᑦ.[1]
• ᐃᒻᒥᓃᖃᑦᑕᕐᓂᕐᒧᑦ ᐊᒥᓲᓂᕆᔭᖓ ᓄᓇᕗᒻᒥ ᐊᕐᕕᓂᓕᖕᓄᑦ ᐊᒥᓲᓂᕐᓴᐅᕗᖅ ᑲᓇᑕᓕᒫᒥ ᐊᑯᓪᓕᖅᐹᕆᔭᖓᒍᑦ.
• ᐳᕙᒡᓗᖃᑦᑕᕐᓂᕐᒧᑦ ᐊᒥᓲᓂᕆᔭᖓ 70-ᓄᑦ ᐊᒥᓱᐊᖅᑎᖅᓯᒪᓂᕐᓴᐅᕗᖅ ᑲᓇᑕᒥᐅᑦ ᐊᑯᓪᓕᖅᐹᖅᓱᕐᓂᕆᔭᖓᒍᑦ.[2]
• 2001 ᓄᓇᖃᖅᑳᖅᓯᒪᔪᓄᑦ ᓈᓴᖅᑕᐅᓯᒪᔪᒥ ᖃᐅᔨᓚᐅᕐᒪᑕ 53 ᐳᓴᓐᑎᐅᔪᑦ ᐃᓄᐃᑦ ᐃᓄᒋᐊᓗᐊᖅᑐᓂᑦ ᐃᒡᓗᒦᓐᓂᖏᓐᓄᑦ, ᒪᕐᕈᐊᖅᑎᖅᓯᒪᑲᓴᖕᓂᕐᓴᐅᓪᓗᓂ ᑲᓇᑕᒥᐅᑦ ᐊᒥᓲᓂᕆᔭᖓᓂᑦ 18 ᐳᓴᓐᑎᒧᑦ.
• 2003-ᒥ ᖃᐅᔨᓴᖅᑕᐅᓯᒪᔪᖅ ᑰᒑᔪᒃ, ᓄᓇᕗᒥ, ᓂᕿᑖᕈᑎᒃᓴᖅᑖᖅᐸᒃᑐᓂᑦ, ᑕᓪᓕᒪᐅᔪᑦ ᐊᕐᕕᓂᓕᐅᔪᓂᑦ ᐃᓄᐃᑦ ᐃᒡᓗᖃᖅᑎᐅᔪᑦ ᓇᓗᓇᐃᖅᑕᐅᓚᐅᖅᐳᑦ ᓂᕿᑖᕈᑎᒃᓴᖅᑖᕆᐊᖃᖅᐸᖕᓂᖏᓐᓂᒃ. ᑖᓐᓇ ᐱᔾᔪᑎᒃᓴᐅᔪᖅ ᐊᒃᑐᐃᔭᐅᔾᔪᑕᐅᕙᒃᑐᖅ ᐊᒥᓱᑦ ᐃᓄᐃᑦ ᓄᓇᓕᖏᓐᓄᑦ. ᐃᒡᓗᖃᖅᑎᐅᔪᑦ ᐊᕝᕙᖏᑕ ᐅᖓᑎᐊᓃᑦᑐᑦ ᖃᐅᔨᓴᖅᑕᐅᓯᒪᔪᑦ ᑳᖃᑦᑕᖅᓯᒪᕗᑦ ᐊᕐᕌᓂᐅᓚᐅᖅᑐᒥ.[3]
• ᐃᓕᓐᓂᐊᖅᑐᓂᑦ ᖁᕝᕙᓯᖕᓂᖅᐹᖓᒍᑦ ᐃᓱᓕᑕᐅᓯᒪᔪᑦ ᐃᓄᖕᓂᑦ ᐊᑦᑎᓐᓂᕐᓴᐅᕗᖅ ᑖᒃᑯᓇᙵᑦ ᖃᓪᓗᓈᓂ ᑲᓇᑕᒥ. 33 ᐳᓴᓐᑎᐅᔪᑦ ᓄᓇᖃᖅᑳᖅᓯᒪᔫᖏᑦᑐᑦ ᑲᓇᑕᒥᐅᑕᐅᔪᑦ ᐱᓯᒪᑦᑎᓇᑎᒃ ᓇᓪᓕᐊᑐᐃᓐᓇᖅ ᖁᕝᕙᓯᖕᓂᐅᔪᓂᒃ ᓯᓚᑦᑐᖅᓴᕐᕕᒻᒥ, ᐃᓄᐃᑦ ᐊᒥᓲᓂᖏᑦ ᒪᕐᕈᐊᖅᑎᖅᓯᒪᓪᓗᓂ 66 ᐳᓴᓐᑎᒥ.[4]
• ᐃᖅᑲᓇᐃᔮᖃᖏᓐᓂᕐᒧᑦ ᐊᒥᓲᓂᖓ ᐃᓄᖕᓂᑦ ᐱᖓᓱᐊᖅᑎᖅᓯᒪᔫᑉ ᐅᖓᑎᐊᓄᐊᖅᓯᒪᓪᓗᓂ ᑖᒃᑯᙵᑦ ᑲᓇᑕᒥᐅᑦ ᐊᑯᓪᓕᖅᐹᕆᔭᖏᓐᓂᑦ ᐊᕐᕕᓂᓖᑦ ᐊᑕᐅᓯᕐᓗ ᐳᓴᓐᑎᓄᑦ, 22 ᐳᓴᓐᑎᖦᖢᓂ.[5]
• ᐊᕙᑎᓕᕆᓂᕐᒧᑦ ᐃᓱᒫᓘᑎᒋᔭᐅᔪᑦ, ᓲᕐᓗ ᓱᕈᔪᓐᓇᖅᑐᑦ ᐊᒻᒪᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ, ᖁᕝᕙᓯᒃᑐᒻᒪᕆᒻᒥᒃ ᐊᒃᑐᐃᔾᔪᑕᐅᓯᒪᕗᖅ ᐃᓄᖕᓄᑦ.
• ᓇᓗᓇᐃᒃᑯᑎᐅᔪᓕᒫᑎᒍᑦ ᐃᓗᓯᕐᒧᑦ ᓇᓗᓇᐃᔭᐅᑎᑦ ᐊᑐᐃᓐᓇᐅᔪᑦ ᐃᓄᖕᓄᑦ, ᐃᓄᐃᑦ ᐊᑭᓕᖅᓱᐃᕐᔪᐊᕐᓂᕐᓴᒻᒪᕆᐅᕗᑦ ᓄᓇᖃᖅᑳᖅᓯᒪᔪᑐᐊᖑᖏᑦᑐᓄᑦ ᑲᓇᑕᒥᐅᑕᐅᖃᑎᒋᔭᖏᓐᓂᑦ, ᑭᓯᐊᓂᑦᑕᐅᖅ ᓄᓇᖃᖅᑳᖅᓯᒪᔪᓂᑦ ᐊᓪᓚᖓᔪᓂᓪᓗ ᓄᓇᖃᖅᑳᖅᓯᒪᔫᖃᑎᖏᓐᓂᑦ.

ᖃᐅᔨᒪᓂᖅ, ᖃᓄᐃᖏᑦᑎᐊᕐᓂᖅ ᐊᒻᒪᓗ ᓄᓇᓖᑦ

ᐅᖃᐅᓰᑦ “ᖃᐅᔨᒪᓂᖅ ᖃᓄᐃᖏᑦᑎᐊᕐᓂᖅ ᓄᓇᓖᑦ” ᐅᖃᓪᓚᖕᓂᖃᖅᐳᑦ ᐊᔪᙱᓂᖅ ᐱᓕᕆᕝᕕᐅᑉ ᐃᒃᐱᒋᓪᓗᐊᑕᖅᓯᒪᔭᖏᓐᓂᓄᑦ ᐃᓄᐃᑦ ᐃᓗᓯᕆᔭᖏᓐᓂ.

ᖃᐅᔨᒪᓂᖅ

ᓴᙱᔪᓂᒃ ᐃᓄᖕᓅᖓᔪᓂᒃ ᖃᐅᔨᒪᓂᖃᕆᐊᖃᕋᑦᑕ, ᓇᓗᓇᐃᕈᑎᒃᓴᖃᕆᐊᖃᖅᐳᒍᓪᓘᓐᓃᑦ, ᓴᖅᑭᑦᑎᓗᑕ ᐊᑐᐊᒐᓂᒃ, ᐱᓕᕆᐊᒃᓴᓂᒃ ᐱᔨᑦᑎᕋᕈᑎᓂᓪᓗ ᐃᓄᖕᓂᑦ, ᐃᓚᒌᓂᑦ ᓄᓇᓕᐅᔪᓂᓪᓗ ᐱᔭᐅᔭᕆᐊᓖᑦ ᐊᑐᓕᖅᑎᑕᐅᔪᓐᓇᖁᓪᓗᒋᑦ. ᐊᔪᙱᓂᖅ ᐱᓕᕆᖃᑎᖃᑦᑎᐊᖅᐸᒃᐳᖅ ᐊᓯᖏᓐᓂᒃ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ ᓴᖅᑭᑦᑎᔪᓐᓇᖁᓪᓗᒋᑦ ᖃᐅᒪᔨᓂᕐᒥᒃ ᐊᒻᒪᓗ ᖃᐅᔨᒪᓂᕆᔭᐅᔪᑎᒍᑦ ᖃᓄᐃᓕᐅᕐᓂᐅᔪᓂᒃ ᑕᒪᒃᑯᐊ ᐱᐅᓯᕚᓪᓕᕈᑎᐅᓕᕈᓐᓇᖅᑐᑦ ᖃᓄᐃᓕᖓᓂᕆᔭᐅᔪᓂᑦ ᐃᓄᐃᑦ ᐃᓗᓯᖏᑦ ᖃᓄᐃᖏᑦᑎᐊᕆᐊᖃᕐᓂᖏᓪᓗ ᐃᑲᔪᖅᑕᐅᖁᓪᓗᒋᑦ.

ᖃᓄᐃᖏᑦᑎᐊᕐᓂᖅ

ᐊᔪᙱᓂᖅ ᐃᓕᓴᖅᓯᕗᖅ ᐱᒻᒪᕆᐅᓂᖓ ᐅᖃᐅᓯᖃᕐᓂᕐᒧᑦ ᐃᓱᒪᒧᑦ, ᑎᒥᒃᑯᑦ, ᐱᖅᑯᓯᑎᒍᑦ ᐊᒻᒪᓗ ᑕᕐᓂᐅᑉ ᐃᓚᒋᔭᖏᓐᓂᒃ ᐃᓗᓯᕐᒥ ᖃᓄᐃᖏᑦᑎᐊᕆᐊᖃᕐᓂᕐᒥᓗ. ᐃᑲᔪᖅᓱᐃᓂᖅ ᐱᖅᑯᓯᑦᑎᓐᓂᒃ, ᐅᖃᐅᓯᑦᑎᓐᓂᒃ, ᐊᕙᑎᑦᑎᓐᓂᒃ, ᓂᕿᓪᓚᕆᑦᑎᓐᓂᒃ ᖃᓄᐃᓕᐅᕐᓂᕆᕙᒃᑕᑦᑎᓐᓂᓪᓗ ᐊᓂᒍᐃᔾᔪᑕᐅᓇᓱᓪᓗᐊᑕᖅᐳᑦ ᐃᓗᓯᖅ ᐱᔾᔪᑎᒋᓪᓗᒍ ᐊᔾᔨᒌᓐᓂᕐᓯᐅᕐᓂᒃᑯᑦ ᑭᒃᑯᑐᐃᓐᓇᕐᓄᑦ ᑲᓇᑕᒥᐅᑕᐅᔪᓂᒃ.

ᓄᓇᓖᑦ

ᐅᖃᐅᓯᖃᕐᓂᖅ ᐱᔾᔪᑎᐅᓕᖅᓯᒪᔪᓂᑦ ᐃᓗᓯᕐᒧᑦ, ᓲᕐᓗ ᐃᒡᓗᓕᕆᓂᖅ, ᐱᕙᓪᓕᐊᔪᓕᕆᓂᖅ ᐊᒻᒪᓗ ᓇᒻᒥᓂᖅ ᓇᓗᓇᐃᖅᓯᓂᖅ, ᐃᓚᒋᔭᐅᓪᓗᐊᑕᖅᐳᖅ ᐱᐅᓯᕚᓪᓕᖅᑎᑦᑎᒐᔭᕐᓂᕐᒥᒃ ᐃᓄᐃᑦ ᐃᓗᓯᖏᓐᓂᒃ ᖃᓄᐃᖏᑦᑎᐊᕆᐊᖃᕐᓂᖏᓐᓂᓪᓗ. ᐃᓄᖕᓅᖓᔪᑦ ᐋᖅᑭᒋᐊᕈᑎᒃᓴᐃᑦ ᐃᓚᓕᐅᑎᓯᒪᑦᑎᐊᕆᖃᖅᐳᑦ ᐱᖅᑯᓯᑦᑎᓐᓂ ᐱᒻᒪᕆᐅᔪᖁᑎᑦᑎᓐᓄᑦ ᐱᓕᒻᒪᒃᓴᖃᑦᑕᖅᑕᑦᑎᓐᓂᓗ ᐊᑐᓕᖅᑎᑦᑎᕙᓪᓕᐊᑎᓪᓗᑕ ᓇᓗᓇᐃᖅᓯᔾᔪᑎᑦᑎᐊᕙᐅᔪᑦ ᐱᓕᒻᒪᒃᓴᕐᓂᐅᕙᒃᑐᓪᓗ ᐊᓯᖏᓐᓄᑦ ᐱᐅᓯᐅᔪᓄᑦ. ᓱᓕᓂᐊᕐᓂᕋᕈᑎᒋᓯᒪᔭᕗᑦ ᐃᓄᐃᑦ ᐱᒻᒪᕆᐅᔪᖁᑎᖏᓐᓄᑦ ᑐᑭᖃᕆᕗᖅ ᐅᖃᐅᓯᖃᕆᐊᖃᕐᓂᑦᑎᓐᓂᒃ ᑖᒃᑯᓂᖓ ᓇᓗᓇᖅᑐᑦ ᐱᔾᔪᑎᒃᓴᐅᔪᓂᒃ ᐃᓚᒌᑦ ᓄᓇᓕᐅᔪᓪᓗ ᐃᓗᓕᖏᓐᓃᑦᑐᓂᒃ.