ᓱᓇᓕᕆᕙᓐᓂᕗᑦ

ᐃᓄᐃᑦ ᑐᑦᑕᕐᕕᖓᓂ ᑲᑎᕐᓱᐃᕙᑦᑐᑦ ᐊᒻᒪ ᑕᐅᖅᓰᖃᑎᒌᒍᑎᖃᖅᓱᑎᒃ ᑐᑭᓯᒋᐊᕐᕕᒃᓴᓂᒃ ᐊᒻᒪ ᖃᐅᔨᒪᔭᐅᔪᓂᒃ ᐊᔾᔨᒌᖏᑦᑐᓂᒃ ᖃᓂᒪᖃᕐᑕᐃᓕᓂᕐᒧᑦ ᐊᒻᒪ ᖃᓄᐃᖏᑦᓯᐊᕆᐊᖃᓂᕐᒧᑦ ᐃᓱᒫᓗᒍᑕᐅᔪᓂᒃ ᐃᓄᓐᓄᑦ.

ᐅᑯᐊ ᑕᕝᕙ ᐃᓄᐃᑦ ᑐᑦᑕᕐᕕᖓᓂ ᐱᓕᕆᐊᖑᕙᑦᑐᑦ ᐃᓚᖏᑦ:

• ᑲᒪᒋᔭᖃᖅᐸᑦᑐᒍᑦ ᐃᓱᒪᒃᑯᑦ ᖃᓄᐃᖏᑦᓯᐊᕆᐊᖃᓂᕐᒧᐊᖓᔪᓂᒃ ᐊᒻᒪ ᐃᒥᐊᓗᒻᒧᑦ ᐊᔪᕆᓯᒪᓂᕐᒥᒃ, ᖃᓄᐃᖏᑦᓯᐊᕐᓗᑎᒃ ᐃᓅᒋᐊᖃᓂᕐᒥᒃ, ᐃᓪᓗᓕᕆᓂᕐᒥᒃ, ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᐃᖅᑲᓇᐃᔮᒃᓴᓂᒃ, ᕿᑐᕐᖏᐅᕐᓂᕐᒥᒃ ᐊᒻᒪ ᓱᕈᓰᑦ ᖃᓄᐃᖏᑦᓯᐊᕆᐊᖃᓂᖏᓐᓂᒃ, ᖃᐅᔨᓴᕐᓂᕐᒥᒃ ᐊᒻᒪ ᒪᓕᑦᑕᐅᒋᐊᓕᓐᓂᒃ, ᐊᒻᒪ ᐊᓯᖏᓐᓂᒃ
• ᓴᖅᑭᑎᕆᓂᖅ ᑐᓴᕈᑎᒃᓴᓂᒃ, ᑐᓱᔪᓂᒃ ᑐᑭᓯᒋᐊᕐᕕᒃᓴᓂᒃ, ᑐᓴᕋᒃᓴᓄᐊᖓᔪᓂᒃ, ᐃᓕᓐᓂᐊᕐᓂᓕᕆᓂᕐᒧᑦ ᐊᒻᒪ ᖃᓄᐃᖏᑦᓯᐊᕆᐊᖃᓂᕐᒥᒃ ᑲᔪᖏᖅᓱᐃᓂᕐᒧᑦ ᐃᑲᔪᕈᑎᒃᓴᓂᒃ ᑎᑎᕋᖅᓯᒪᔪᓂᒃ
• ᖃᐅᔨᓴᕐᓂᖅ ᐱᔭᕆᐊᑐᖏᓐᓂᕐᓴᐅᖁᓪᓗᒍ ᑐᑭᓯᐊᔭᐅᒍᓐᓇᕆᐊᖓ
• ᑕᐅᖅᓰᖃᑦᑕᐅᑎᓂᖅ ᑐᑭᓯᒋᐊᕐᕕᒃᓴᓂᒃ ᑲᑎᒪᕐᔪᐊᕐᓂᒃᑯᑦ, ᑲᑎᒪᑐᐃᓐᓇᕐᓂᒃᑯᑦ ᐊᒻᒪ ᑲᓇᑕᒥ ᓄᓇᓖᓪᓗ ᐊᕕᒃᑐᕐᓯᒪᓂᖏᑎᒍᑦ ᑐᓴᐅᒪᐅᑎᓂᒃᑯᑦ
• ᕿᒥᕐᕈᓪᓗᑕ ᖃᓄᐃᑑᓂᖏᓐᓂᒃ ᑭᓐᖒᒪᔭᐅᔪᑦ ᖃᓄᐃᖏᑦᓯᐊᕆᐊᖃᓂᕐᒧᑦ – ᐊᒻᒪ ᖃᐅᔨᒪᔭᐅᔪᑦ ‘ᐊᒥᓲᓂᕐᓴᓄᐊᖑᔪᑦ ᐊᑲᐅᖏᓕᐅᑏᑦ ᖃᓄᐃᖏᑦᓯᐊᕆᐊᖃᓂᕐᒧᑦ’.

ᐋᖅᑭᒃᓱᐃᓯᒪᔪᒍᑦ ᐊᒥᓱᓂᒃ ᐊᑲᐅᔪᓂᒃ, ᐃᓄᓐᓄᑦ ᐊᑐᕐᑕᐅᔪᓐᓇᕐᑐᑎᒃ ᐃᑲᔪᕈᑎᒃᓴᓂᒃ. ᐅᑯᐊ ᐃᓚᖏᑦ ᑕᕝᕙ:

• ᓯᕗᓪᓕᕐᐹᑦᓯᐊᒥ ᕿᒥᕐᕈᓂᖅ ᐃᓄᐃᑦ ᐊᖑᑏᑦ ᖃᓄᐃᓐᓂᖏᓐᓂᒃ ᐃᓱᒪᒃᑯᑦ, ᐃᒃᐱᒍᓱᓐᓂᒃᑯᑦ ᑎᒥᒃᑯᓪᓗ ᐱᓕᕆᖃᑎᒋᓪᓚᑦᑕᕐᓗᒋᑦ ᐊᖑᑏᑦ
• ᐋᖅᑭᒃᓱᐃᓪᓗᑕ ᑐᑭᓯᓇᑦᓯᐊᕐᑐᓂᒃ ᐅᖃᐅᓯᒃᑯᑦ ᓱᓕᔪᓂᒃ ᖃᓂᒪᓇᕐᑐᖃᕐᑕᐃᓕᓂᕐᒧᑦ ᐊᒻᒪ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᐱᔾᔪᑎᖃᖅᑐᓂᒃ ᐊᒻᒪ ᐃᓄᐃᑦ ᖃᐅᔨᓴᕆᐊᖃᓂᖓᓂᒃ ᐊᒻᒪ ᖃᐅᔨᓴᕐᓂᕐᒧᑦ ᒪᓕᑦᑕᐅᒋᐊᓕᓐᓂᒃ
• ᑎᑎᕋᕐᓂᒃᑯᑦ ᐃᓄᐃᑦ ᖃᐅᔨᒪᓂᖏᓐᓂᒃ ᐃᑲᔪᕈᓐᓇᕐᓂᒃᑯᑦ, ᐊᔪᕆᓯᒪᔪᑦ ᐃᑲᔪᕐᑕᐅᔾᔪᑎᒃᓴᖏᓐᓂᒃ, ᐃᓄᐃᑦ ᐃᕐᓂᓱᑦᓰᔾᔪᓯᖏᓐᓂᒃ, ᐊᒻᒪ ᒪᑭᑕᒍᓐᓇᕐᓂᕐᒥᒃ ᐊᒻᒪ ᑲᔪᓯᒐᓱᐊᖏᓐᓇᕈᓐᓇᕐᓂᕐᒥᒃ
• ᐱᖓᓲᓕᖓᔪᒥᒃ ᐅᖄᓚᑎᑦᓯᖃᑦᑕᓚᐅᕐᒥᔪᒍᑦ ᑕᓚᕕᓴᒃᑯᑦ ᐊᒻᒪ ᕿᓪᓕᕐᑐᒃᑯᑦ ᐃᓄᐃᑦ ᖃᓄᐃᖏᑦᓯᐊᕆᐊᖃᓂᖓ ᐱᔾᔪᑎᒋᓪᓗᒍ
• ᖃᕆᑕᐅᔭᒃᑰᕐᑐᒃᓴᓂᒃ ᑎᑎᕋᖅᓱᑕ ᐊᒻᒪ ᑐᓴᐅᒪᖃᑎᒌᒍᑕᐅᒋᐊᓕᓐᓂᒃ ᐱᔾᔪᑎᖃᖅᑐᓂᒃ ᐃᕐᓂᓱᒃᓰᔪᓕᕆᓂᕐᒥᒃ, ᓯᒡᒐᓕᐊᕐᑐᕐᓂᕐᒥᒃ, ᐃᓪᓗᓕᕆᕐᒥᒃ, ᐊᒻᒪ ᖃᐅᔨᓴᕐᓂᕐᒧᑦ ᒪᓕᑦᑕᐅᒋᐊᓕᓐᓂᒃ.

ᐊᒻᒪ ᕿᓚᓈᕐᐳᒍᑦ ᖁᕕᐊᒋᓪᓗᒍ ᑐᓴᒐᒃᓴᓕᐅᕐᐸᓪᓕᐊᓂᕐᒧᑦ ᐱᓕᕆᐊᒃᓴᑦᑎᓐᓂᒃ ᐊᒻᒪ ᐃᓅᓯᓕᕆᓂᕐᒧᑦ ᐃᓕᕆᐅᑎᒃᓴᓂᒃ ᐊᑐᕆᐊᖅ. ᑕᒪᒃᑯᓄᖓ ᐃᑲᔪᕐᑕᐅᓂᐊᕋᑦᑕ ᑲᔪᖏᖅᓱᐃᒋᐊᖅ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᖃᓄᐃᖏᖅᓯᐊᕋᓱᐊᕐᓂᕐᒧᑦ ᐱᔾᔪᑕᐅᔪᓂᒃ ᐊᒻᒪ ᑕᐅᖅᓰᖃᑦᑕᐅᑎᓂᕐᒧᑦ ᑐᑭᓯᒋᐊᕐᕕᒃᓴᓂᒃ ᐃᓄᐃᓪᓗ, ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᓪᓗ ᐃᑲᔪᕐᑎᓂᒃ ᐃᓄᐃᑦ ᓄᓇᓕᖏᓐᓂ ᐊᒻᒪ ᐊᒥᓱᓂᒃ ᑎᒥᐅᔪᓂᒃ ᑲᑐᔾᔨᖃᑎᒌᓂᓪᓗ ᐱᓕᕆᖃᑕᐅᕙᑦᑐᓂᒃ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ. ᐃᓄᐃᑦ ᑐᑦᑕᕐᕕᖓᓂ ᐋᖅᑭᒃᓱᐃᓯᒪᕗᑦ ᑕᑯᓐᓇᕋᒃᓴᓂᒃ ᐊᒻᒪ ᓇᐃᓈᕐᑐᓂᒃ ᑐᑭᓯᒋᐊᕐᕕᒃᓴᓂᒃ, ᑕᕐᕆᔭᒐᒃᓴᓕᐊᕕᓂᕐᓂᒃ ᐃᓄᓐᓄᑦ, ᑕᑯᒃᓴᐅᑎᑕᐅᓂᐊᕐᑎᓪᓗᒋᑦ ᐱᐅᓂᕐᓴᐃᑦ ᓴᖅᑭᑉᐸᓪᓕᐊᔪᑦ ᐃᓄᐃᑦ ᓄᓇᖓᓂ ᒥᒃᓵᓄᑦ. ᑕᒪᒃᑯᐊ ᑕᑯᓐᓇᕋᒃᓴᐃᑦ ᑕᑯᓐᓇᕋᒃᓴᐃᑦ ᑕᓚᕕᓴᒃᑯᑦ, ᑕᐃᔭᐅᔪᑦ ᖃᓄᕐᑑᕐᓂᖅ-ᕿᓂᕐᓂᖅ ᐃᓚᐃᓐᓈᖏᓐᓂᕐᒥᒃ. ᐊᓯᖏᑦ ᑕᑯᓐᓇᕋᒃᓴᐃᑦ, ᐋᖅᑭᒃᓱᕐᑕᐅᓂᑯᐃᑦ ᒪᒃᑯᑦᑐᓄᑦ, ᐅᓂᒃᑳᕐᑐᑦ ᐊᑐᕐᑕᐅᓯᒪᔪᓂᒃ ᐊᒻᒪ ᓵᓚᑦᓴᕐᓂᕕᓂᕐᓂᒃ ᓯᒡᒐᓕᐊᕐᑐᕈᓐᓇᐃᕐᓂᕐᒥᒃ. ᑕᒪᕐᒥᒃ ᑕᑯᓐᓇᕋᒃᓴᖁᑎᕗᑦ ᐊᑐᐃᓐᓇᐅᑎᑕᐅᕗᑦ ᐅᕙᓂ NAHO YouTube channel. ᐃᓄᐃᑦ ᑐᑦᑕᕐᕕᖓᓂ ᐊᒻᒪ ᐊᑐᕐᐸᒻᒥᔪᑦ ᖃᕆᑕᐅᔭᒃᑯᑦ ᐆᒥᖓ Facebook ᐊᒻᒪ Twitter, ᑖᒃᑯᐊᒃ ᒪᕐᕉᒃ ᐊᑐᕐᑕᐅᒡᒍᔫᒃ ᐃᓅᓯᓕᕆᓂᕐᒧᑦ ᑐᓴᒐᒃᓴᓂᐊᕈᑕᐅᓪᓗ, ᑕᐅᖅᓰᖃᑦᑕᐅᑎᒍᑕᐅᓪᓗᑎᒃ ᓄᑖᓂᒃ ᑐᓴᕈᑕᐅᓪᓗᑎᒃ ᐱᓕᕆᐊᑦᑎᓐᓂᒃ.

ᐊᐅᓚᑦᓯᓂᕐᒧᑦ ᑲᑎᒪᔨᕈᒦᑦ ᐊᒻᒪ ᐃᓄᑐᖃᐃᑦ ᐃᑲᔪᕐᑎᐅᔪᑦ

ᐃᓄᐃᑦ ᑐᑦᑕᕐᕕᖓ ᑎᓕᔭᐅᕙᑦᑐᑦ ᐱᓕᕆᐊᒃᓴᖏᓐᓂᒃ ᑖᒃᑯᓄᖓ ᐊᐅᓚᑦᓯᓂᕐᒧᑦ ᑲᑎᒪᔨᕈᓯᕐᓄᑦ. ᑖᒃᑯᐊ ᐊᐅᓚᑦᓯᓂᕐᒧᑦ ᑲᑎᒪᔨᕈᓰᑦ ᑲᑎᒪᔨᖃᕐᑐᑦ ᒪᕐᕉᓐᓂᒃ ᑲᓇᑕᒥ ᓄᓇᖃᖅᑳᖅᓯᒪᔪᑦ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᑲᑐᔾᔨᖃᑎᒌᖓᓄᑦ ᑲᑎᒪᔩᓐᓂᒃ ᑎᓕᔭᐅᓯᒪᔪᓂᒃ ᑲᓇᑕᒥ ᐃᓄᐃᑦ ᑕᐱᕇᒃᑯᖏᓐᓄᑦ, ᐊᑕᐅᓯᕐᒥᓪᓗ ᓂᕈᐊᕐᑕᐅᓯᒪᔪᒥᒃ ᑕᒪᐃᓐᓂᑦ ᓄᓇᑖᕐᓯᒪᓂᒃᑯᑦ ᑲᑐᔾᔨᖃᑎᒌᓄᑦ, ᐊᒻᒪ ᐊᑕᐅᓯᕐᒥᒃ ᓂᕈᐊᕐᑕᐅᓯᒪᔪᒥᒃ ᐸᐅᒃᑑᑎᒃᑯᓐᓄᑦ ᑲᓇᑕᒥ ᐃᓄᐃᑦ ᐊᕐᓇᐃᑦ ᑲᑐᔾᔨᖃᑎᒌᖏᓐᓂᑦ, ᐊᒻᒪ ᐊᑕᐅᓯᕐᒥᒃ ᓂᕈᐊᕐᑕᐅᓯᒪᔪᒥᒃ ᑲᓇᑕᒥ ᐃᓄᐃᑦ ᒪᒃᑯᑦᑐᑦ ᑲᑎᒪᔨᖏᓐᓂᑦ.

ᐅᓪᓗᒥ ᑲᑎᒪᔨᐅᔪᑦ ᐃᓄᐃᑦ ᑐᑦᑕᕐᕕᖓᑕ ᐊᐅᓚᑦᓯᓂᕐᒧᑦ ᑲᑎᒪᔨᕈᓯᖏᓐᓄᑦ ᐅᑯᐊᖑᕗᑦ:

• ᐋᓂ ᐸᑲᓐ (ᑭᒡᒐᕐᑐᕐᑐᖅ ᐸᐅᑦᑑᑎᒃᑯᓐᓄᑦ ᐃᓄᐃᑦ ᐊᕐᓇᐃᑦ ᑲᓇᑕᒥ)
• ᐋᓂ ᑰᔅ (ᑭᒡᒐᕐᑐᕐᑐᖅ ᐃᓄᕕᐊᓗᐃᑦ ᑯᐊᐳᕇᓴᖓᓂᒃ)
• ᑯᐊᕐᑦᓂ ᓚᐅᕌᒃ (ᑭᒡᒐᕐᑐᕐᑐᖅ ᑲᓇᑕᒥ ᐃᓄᐃᑦ ᒪᒃᑯᑦᑐᑦ ᑲᑎᒪᔨᖏᓐᓂᒃ)
• ᑲᑐᕆᓐ ᒥᓂᔅ, ᑐᑭᒧᐊᕐᑎᑦᓯᔨ (ᑭᒡᒐᕐᑐᕐᑐᖅ ᑲᓇᑕᒥ ᐃᓄᐃᑦ ᑕᐱᕇᒃᑯᖏᓐᓂᒃ)
• ᓇᑖᓐ ᐆᐱᑦ (ᑭᒡᒐᕐᑐᕐᑐᖅ ᐃᓄᐃᑦ ᑕᐱᕇᒃᑯᓐᓂᒃ ᑲᓇᑕᒥ)
• ᓚᐅᕆ ᕗᐊᑦ (ᑭᒡᒐᕐᑐᕐᑐᖅ ᓄᓇᕕᒻᒥ ᐊᕕᒃᑐᕐᓯᒪᔪᓄᑦ ᑲᑎᒪᔨᓂᒃ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᐃᓅᓯᓕᕆᓂᕐᒧᓪᓗ)
• ᐃᐊᑦᓇ ᕗᐃᓐᑐᔅ (ᑭᒡᒐᕐᑐᕐᑐᖅ ᓄᓇᑦᓯᐊᕗᑦ ᒐᕙᒪᖓᓂᒃ)
• ᓛᑯᓗᒃ ᕗᐃᓕᐊᒻᓴᓐ-ᐸᑐᕆ (ᑭᒡᒐᕐᑐᕐᑐᖅ ᓄᓇᕗᑦ ᑐᓐᖓᕕᒃᑯᓐᓂᒃ)

ᐃᓄᐃᑦ ᑐᑦᑕᕐᕕᖓᓂ ᑕᓪᓕᒪᓂᒃ ᐃᓄᑐᖃᓂᒃ ᐃᑲᔪᕐᑎᓖᑦ, ᐊᑕᐅᓯᕐᒥᒃ ᑕᒪᐃᓐᓂᑦ ᐃᓄᐃᑦ ᓄᓇᓕᖏᓐᓂᑦ ᐊᕕᒃᑐᕐᓯᒪᔪᓂᑦ ᐊᒻᒪ ᐊᑕᐅᓯᕐᒥᒃ ᖃᓪᓗᓈᑦ ᓄᓇᖓᓂᕐᒥᐅᒥᒃ. ᐃᓄᑐᖃᐃᑦ ᐃᑲᔪᕐᑎᐅᔪᑦ ᑕᐅᖅᓰᖃᑦᑕᐅᑎᑦᓯᕙᑦᑐᑦ ᖃᐅᔨᒪᔭᒥᓂᒃ ᐃᓄᐃᑦ ᐱᓐᓇᕆᔭᖏᑕ ᒥᒃᓵᓄᑦ, ᐱᓕᕆᔾᔪᓯᖏᓐᓂᒃ ᐊᒻᒪ ᑭᓐᖒᒪᔭᐅᔪᓂᒃ ᐊᐅᓚᑦᓯᓂᕐᒧᑦ ᑲᑎᒪᔨᐅᔪᓄᑦ ᐊᒻᒪ ᐃᖅᑲᓇᐃᔭᕐᑎᖏᓐᓄᑦ ᐃᓄᐃᑦ ᑐᑦᑕᕐᕕᖓᓂ.