ᐊᑎᖅ ᐊᒻᒪ ᓇᓗᓇᐃᒃᑯᑕᖅ

ᐃᓄᐃᑦ ᑐᑦᑕᕐᕕᖓᑦ ᑲᓇᑕᒥ ᓄᓇᖃᖅᑳᖅᓯᒪᔪᑦ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᑲᑐᔾᔨᖃᑎᒌᒃᑯᖏᓐᓂ ᓯᕗᓪᓕᕐᐹᒥ ᑕᐃᔭᐅᓚᐅᕐᓯᒪᔪᑦ ᐊᔪᓐᖏᓐᓂᖅ ᐱᓕᕆᕕᒃ, ᑭᓯᐊᓂ ᐊᓯᔾᔨᕐᑕᐅᓚᐅᕐᓯᒪᔪᖅ ᐅᒃᑐᐱᕆ 2008,ᒥ.

ᐊᓯᔾᔨᕐᑕᐅᓚᐅᕐᑎᓐᓇᒍ ᓱᓕ ᐊᑎᖓ, ᐊᒥᓱᓄᑦ ᐃᓄᓐᓄᑦ ᐅᖃᐅᑎᔭᐅᖃᑦᑕᓚᐅᕐᑐᒍᑦ ᐋᓐᓇ ᑕᐃᔭᐅᒍᓯᖓ ᐊᔪᖏᓐᓂᖅ, ᑐᑭᓕᒃ “ᐱᓕᒻᒪᒃᓴᕐᓂᖅ ᐊᒻᒪ ᖃᐅᔨᒪᔪᓂᖅ”, ᓈᒻᒪᓈᖏᓗᐊᕐᓂᕋᖅᓱᒍ ᐃᓄᓐᓄᐊᖓᔪᓂᒃ ᖃᓄᐃᖏᑦᓯᐊᕋᓱᐊᕐᓂᓕᕆᓂᑦᑎᓐᓄᑦ. ᓈᓚᖃᑦᑕᓚᐅᕋᑦᑎᒍ ᐊᒻᒪ ᐊᓯᔾᔩᒍᑎᒋᓪᓗᒍ ᐃᓄᐃᑦ ᑐᑦᑕᕐᕕᖓᓂᒃ ᑕᐃᔭᐅᓂᐊᓕᕐᑎᓪᓗᒍ. ᑖᓐᓇ ᐊᑎᖓ ᓇᓗᓇᐃᕐᓯᒍᑕᐅᒻᒪᑦ ᐃᓄᓐᓄᐊᖓᔪᓂᒃ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᑐᕌᖓᔪᓂᒃ ᐱᓕᕆᓂᐊᓂᒃ ᑲᓇᑕᒥ ᓄᓇᖃᖅᑳᖅᓯᒪᔪᑦ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᑲᑐᔾᔨᖃᑎᒌᖓᓂ.

ᓇᓗᓇᐃᒃᑯᑕᖅ

ᑖᓐᓇ ᓇᓗᓇᐃᒃᑯᑕᕗᑦ ᓴᖅᑭᐅᒪᑎᑦᓯᔪᖅ ᓄᓇᒥ, ᐃᒪᕐᒥᒃ, ᐊᐳᒻᒥᒃ ᐊᒻᒪ ᕿᓚᒻᒥᒃ “ᓇᓗᓇᐃᒃᑯᑕᐅᑉ ᐃᓗᐊᓂ”, “sundog”, ᑕᖅᓴᐅᓪᓗᓂ ᐊᔾᔨᐅᖏᑦᑐᖅ ᐊᔾᔨᓐᖑᐊᖅ ᑎᑎᖅᑐᒐᕐᓯᒪᒻᒪᑦ ᐅᑭᐅᕐᑕᕐᑑᑉ ᕿᓚᖓᓂᒃ.

ᐊᒻᒪ ᓴᓐᖏᔪᒥᒃ ᑐᑭᓯᓇᑦᓴᐅᑎᒋᔪᒥᒃ ᐅᖃᐅᓯᕐᑕᖃᖅᓱᓂ ᐃᒃᐱᒍᓱᒍᑕᐅᔪᒥᒃ ᐃᓄᐃᑦ ᑐᑦᑕᕐᕕᖓᓂᒃ ᖃᓄᖅ ᑐᑭᖃᒪᖔᑦ. ᐅᖃᐅᓯᕐᑕᖓ ᐃᒪᐃᓕᖓᒻᒪᑦ “ᖃᐅᔨᒪᓂᖅ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒥᒃ ᓄᓇᓕᓐᓂ”.

ᖃᐅᔨᒪᓂᖅ – ᓴᓐᖏᔪᓂᒃ ᐃᓄᓐᓄᐊᖓᔪᑦ ᖃᐅᔨᒪᔭᑦ, ᐅᕝᕙᓘᓐᓃᑦ ᖃᐅᔨᔾᔭᕈᑎᓪᓚᕇᑦ, ᐋᖅᑭᒃᓱᐃᒋᐊᖃᓂᕐᒧᑦ ᒪᓕᒐᒃᓴᓂᒃ, ᐱᓕᕆᐊᒃᓴᓂᒃ ᐊᒻᒪ ᐃᑲᔪᕈᑎᒃᓴᓂᒃ ᑭᓐᖒᒪᔭᐅᔪᓂᒃ ᐃᓄᓐᓄᑦ ᑭᒃᑯᑐᐃᓐᓇᕐᓄᑦ, ᐃᓚᒌᓄᑦ ᐊᒻᒪ ᓄᓇᓕᓐᓄᑦ. ᐃᓄᐃᑦ ᑐᑦᑕᕐᕕᖓᒍᑦ ᐱᓕᕆᖃᑎᖃᑦᓯᐊᕐᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐋᖅᑭᒃᓱᐃᓂᒃᑯᑦ ᖃᐅᔨᒪᔭᖏᓐᓂᒃ ᐊᒻᒪ ᖃᐅᔨᒪᓂᖏᑎᒍᑦ ᐱᓕᕆᐊᒃᓴᓂᒃ ᐊᑐᕐᑕᐅᔪᓐᓴᕐᑐᓂᒃ ᓂᐱᖃᕈᓐᓇᕐᓂᕐᒧᑦ ᐋᖅᑭᒃᓱᐃᒋᐊᕈᑕᐅᓗᑎᒃ ᐃᑲᔪᕈᑎᒃᓴᓂᒃ ᐃᓄᐃᑦ ᖃᓂᒪᓇᕐᑐᖃᕆᐊᖃᖏᓐᓂᖏᑕ ᐊᒻᒪ ᖃᓄᐃᖏᑦᓯᐊᕆᐊᖃᓂᖏᑕ ᒥᒃᓵᓄᑦ.

ᖃᓄᐃᖏᑦᓯᐊᕋᓱᐊᕐᓂᕐᒧᐊᖓᔪᑦ – ᐃᓄᐃᑦ ᑐᑦᑕᕐᕕᖓᓂ ᐃᓕᓴᕐᓯᓯᒪᕗᑦ ᐱᒻᒪᕆᐅᓂᖏᓐᓂᒃ ᑲᒪᒋᔭᖃᕆᐊᖅ ᐃᓱᒪᒃᑯᑦ ᐊᕐᓱᕈᕐᓂᕐᒧᑦ, ᑎᒥᒃᑯᓪᓗ, ᐃᓕᖅᑯᓯᒃᑯᑦ, ᐊᒻᒪ ᐅᒃᐱᕆᔭᖏᑎᒍᑦ ᑐᕌᖓᔪᓂᒃ ᖃᓂᒪᓂᖃᕆᐊᖃᖏᓐᓂᕐᒧᑦ ᐊᒻᒪ ᖃᓄᐃᖏᑦᓯᐊᕋᓱᐊᕐᓂᕐᒧᑦ. ᐃᑲᔪᕐᓯᓗᑎᒃ ᐃᓕᖅᑯᓯᑦᑎᓐᓂᒃ, ᐅᖃᐅᓯᑦᑎᓐᓂᒃ, ᐊᕙᑎᒧᐊᖓᔪᓂᒃ, ᐱᖅᑯᓯᖏᑎᒍᓪᓗ ᓂᕿᖃᕆᐊᖃᓂᕐᒧᑦ ᐊᒻᒪ ᐱᓕᕆᐊᒃᓴᓄᑦ ᑲᔪᓯᒍᑕᐅᓂᐊᕐᑐᓂᒃ ᖃᓄᐃᖏᑦᓯᐊᕋᓱᐊᕐᓂᕐᒧᑦ ᐊᖑᒻᒪᑎᓯᒪᔪᓂᒃ ᑲᓇᑕᒥᐅᑕᓕᒫᓄᑦ ᐃᓄᐃᑦ ᐊᓯᖏᓐᓄᑦ.

ᓄᓇᓖᑦ – ᑲᒪᒋᔭᖃᓂᖅ ᐃᑲᔪᕆᐊᕈᑎᒃᓴᓂᒃ ᖃᓂᒪᓇᖃᕆᐊᖃᖏᓐᓂᕐᒧᑦ, ᓲᕐᓗ ᐃᓪᓗᖃᑦᓯᐊᕆᐊᖃᓂᕐᒧᑦ, ᑮᓇᐅᔭᓕᐅᕈᑎᒃᓴᓂᒃ ᐋᖅᑭᒃᓱᐃᓂᕐᒧᑦ ᐊᒻᒪ ᐃᒻᒥᒃᑯᑦ ᐊᐅᓚᑦᓯᒍᓐᓇᕐᓂᕐᒧᑦ, ᐱᒻᒪᕆᐅᒻᒪᑕ ᑲᔪᓯᑎᑦᓯᒋᐊᖃᓂᕐᒧᑦ ᐱᐅᓯᑎᑦᓯᒋᐊᕆᐊᖅ ᐃᑲᔪᕈᑎᒃᓴᓂᒃ ᐃᓄᐃᑦ ᖃᓂᒪᓇᕐᑐᖃᕆᐊᖃᖏᓐᓂᖏᓐᓄᑦ ᐊᒻᒪ ᖃᓄᐃᖏᑦᓯᐊᕈᑎᒃᓴᖏᓐᓂᒃ. ᐃᓄᓐᓄᑦ ᐃᑲᔪᕈᑎᒃᓴᐃᑦ ᐊᑦᑐᐊᕆᐊᖃᒪᑕ ᐃᓕᖅᑯᓯᖓᑎᒍᑦ ᐱᒻᒪᕆᐅᑎᑕᐅᔪᓄᑦ ᐊᒻᒪ ᐱᓕᕆᔾᔪᓯᖏᓐᓄᑦ ᓴᖅᑭᑎᑦᓯᓂᒃᑯᑦ ᐱᐅᓂᕐᐹᓂᒃ ᖃᐅᔨᒍᑎᒃᓴᓂᒃ ᐊᒻᒪ ᐱᓕᕆᔾᔪᒃᓴᓂᒃ. ᐱᓂᐊᕐᓂᖃᕐᐳᒍᑦ ᐃᓄᐃᑦ ᐱᒻᒪᕆᐅᑎᑕᖏᓐᓄᑦ ᓴᖅᑭᑦᓯᕙᓪᓕᐊᒋᐊᖅ ᐱᑐᐃᓐᓇᐅᖏᑦᑐᓂᒃ ᐃᓱᒫᓗᒍᑕᐅᔪᓂᒃ ᑐᕌᖓᔪᓂᒃ ᐃᓚᒌᓄᑦ ᐊᒻᒪ ᓄᓇᓕᖏᓐᓄᑦ.