ᑭᒃᑰᓂᕗᑦ

ᐃᓄᐃᑦ ᑐᑦᑕᕐᕕᖓ ᑲᓇᑕᒥ ᓄᓇᖃᖅᑳᖅᓯᒪᔪᑦ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᑲᑐᔾᔨᐊᖃᑎᒌᖓᓃᑉᐳᑦ ᑲᑎᕐᓱᐃᕙᑦᑐᑦ ᐊᒻᒪ ᑕᐅᖅᓰᖃᑦᑕᐅᑎᕙᑦᑐᑦ ᑐᑭᓯᒋᐊᕐᕕᒃᓴᓂᒃ ᐊᒻᒪ ᖃᐅᔨᓴᓂᕆᔭᐅᔪᓂᒃ ᐱᔾᔪᑎᖃᖅᓱᑎᒃ ᐊᔾᔨᒌᖏᑦᑐᓂᒃ ᖃᓂᒪᓇᕐᑐᖃᕐᑕᐃᓕᓂᕐᒧᑦ ᐊᒻᒪ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᐱᔾᔪᑎᒋᔭᐅᔪᓂᒃ ᐃᓱᒫᓗᒍᑎᒋᔭᐅᓪᓗᑎᒃ ᐃᓄᓐᓄᑦ. ᐃᓄᓐᓄᐊᓕᖓᔪᓕᕆᓂᕐᒧᑦ ᐱᓕᕆᕕᐅᔪᒍᑦ ᐃᓗᐊᓂ ᑲᓇᑕᒥ ᓄᓇᖃᖅᑳᖅᓯᒪᔪᑦ ᖃᓄᐃᖏᑦᓯᐊᖃᓱᐊᕐᓂᓕᕆᓂᐊᓄᑦ ᑲᑐᔾᔨᖃᑎᒌᖓᓂ, ᑲᓇᑕᒥ ᑲᑐᔾᔨᖃᑎᒌᓄᑦ ᑲᔪᖏᖅᓱᐃᔨᐅᓪᓗᑎᒃ ᖃᓂᒪᓇᕐᑐᖃᕐᑕᐃᓕᓂᕐᒧᑦ ᐊᒻᒪ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᑐᕌᖓᔪᓂᒃ ᐊᓪᓚᓄᑦ, ᐃᓄᓐᓄᑦ ᐊᒻᒪ ᐊᓪᓚᖓᔪᓄᑦ.

ᐱᒻᒪᕆᐅᑎᑕᕗᑦ, ᑐᓐᖓᕕᒃᓴᓕᐊᕆᓯᒪᔭᕗᑦ, ᑐᕌᒐᒃᓴᕗᑦ ᐊᒻᒪ ᓯᕗᓪᓕᐅᔾᔭᐅᖁᔭᐅᓯᒪᔪᑦ ᐱᓕᕆᐊᑦᑎᓐᓄᑦ ᓄᑖᓂ ᐊᕐᕌᒍᓯᒪᓕᕐᑐᓂ ᐊᑐᐃᓐᓇᕈᖅᑎᑕᐅᓯᒪᔪᕗᑦ ᑎᑎᕋᖅᓯᒪᔭᑦᑎᓐᓂ ᑕᐃᔭᐅᔪᓂ “2010-15, ᒥ ᐱᓕᕆᐊᒃᓴᑦᑎᓐᓄᑦ ᐸᕐᓇᒃᑕᐅᓯᒪᔪᑦ”. ᐅᖃᓕᒫᕈᓐᓇᕐᑕᓯ ᐅᕙᓂ >>

ᑐᓐᖓᕕᖓ

ᐃᓄᐃᑦ ᑐᑦᑕᕐᕕᖓ ᑲᓇᑕᒥ ᓄᓇᖃᖅᑳᖅᓯᒪᔪᑦ ᖃᓄᐃᖏᑦᓯᐊᕋᓱᐊᕐᓂᓕᓂᕐᒧᑦ ᑲᑐᔾᔨᖃᑎᒌᖓᑎᒍᑦ ᑲᔪᓯᑎᑦᓯᒋᐊᖃᖅᑐᑦ ᐊᒻᒪ ᑲᔪᖏᖅᓱᐃᓗᑎᒃ ᖃᓂᒪᖃᖅᑕᐃᓕᓂᕐᒧᑦ ᐊᒻᒪ ᖃᓄᐅᖏᑦᓯᐊᕋᓱᐊᕐᓂᕐᒧᑦ ᐊᑐᕐᑐᒃᓴᓂᒃ ᐃᓄᓐᓄᑦ ᑭᒃᑯᑐᐃᓐᓇᕐᓄᑦ, ᐃᓚᒌᓄᑦ ᐊᒻᒪ ᓄᓇᓕᓐᓄᑦ ᐱᓕᕆᖃᑎᒋᑦᓯᐊᕐᓗᒋᑦ ᑲᑎᕐᓱᐃᓂᒃᑯᑦ ᑐᑭᓯᒋᐊᕐᕕᒃᓴᓂᒃ ᐊᒻᒪ ᑕᐅᖅᓰᖃᑦᑕᐅᑎᒍᑎᖃᓂᒃᑯᑦ ᖃᐅᔨᒪᔭᖏᓐᓂᒃ.

ᑐᕌᒐᖏᑦ

ᐃᓄᑦ ᑐᑦᑕᕕᖓᑕ ᐱᖓᓲᔪᕐᑐᑦ ᑐᕌᒐᕆᓗᐊᖑᐊᑕᖏᑦ ᐅᑯᐊ:

1. ᐱᓕᕆᐊᖃᓂᖅ ᐊᒻᒪ ᑲᔪᖏᖅᓱᐃᓂᖅ ᖃᐅᔨᓴᕐᓂᕐᒥᒃ ᐱᐅᓯᒋᐊᕈᑕᐅᔪᒃᓴᓂᒃ ᖃᓂᒪᖃᕐᑕᐃᓕᓂᕐᒧᑦ ᐊᒻᒪ ᖃᓄᐃᖏᑦᓯᐊᕋᓱᐊᕆᐊᖃᓂᖓᓄᑦ ᐃᓄᐃᑦ.
2. ᑐᑭᓯᐊᓂᕐᓴᐅᒋᐊᖃᓂᖅ ᐊᒻᒪ ᖃᐅᔨᒪᓂᕐᓴᐅᒋᐊᖃᓂᖅ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᐃᓱᒫᓕᒋᔭᐅᔪᑦ ᐊᒃᑐᐃᓂᖏᓐᓂᒃ ᐃᓄᓐᓂᒃ.
3. ᑲᔪᓯᑎᑦᓯᓂᖅ ᐊᒻᒪ ᑲᔪᖏᖅᓱᐃᓂᖅ ᖃᐅᔨᓴᕐᓂᕐᒥᒃ ᑕᒪᐃᓐᓄᐊᖓᑦᓯᐊᕐᑐᓂᒃ, ᐃᒪᐃᓐᓈᖏᑦᑐᓂᒃ, ᐊᑑᑎᖃᑦᓯᐊᕐᑐᓂᒃ ᐊᒻᒪ ᐊᑐᕐᑕᐅᔪᓐᓇᑦᓯᐊᕐᑐᓂᒃ ᐃᓄᓐᓄᑦ.
4. ᐃᑲᔪᖅᓯᓂᒃ ᐊᒻᒪ ᑲᔪᖏᖅᓱᐃᓂᖅ ᐃᓄᓐᓂᒃ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᐃᖅᑲᓇᐃᔭᒃᓵᕐᑖᕐᐸᓪᓕᐊᖁᓪᓗᒋᑦ.
5. ᐊᓯᐅᔨᑎᑦᓯᑦᑕᐃᓕᓂᖅ ᐊᒻᒪ ᑲᔪᖏᖅᓱᐃᓂᖅ ᐃᓄᐃᑦ ᐃᓕᖅᑯᓯᖓᒍᑦ ᖃᐅᔨᒪᔭᐅᔪᓂᒃ ᐊᒻᒪ ᒪᒥᓴᕐᓂᕐᒧᑦ ᐱᓕᕆᒍᓯᖏᓐᓂᒃ.
6. ᐊᑐᐃᓐᓇᕈᖅᑎᑦᓯᓂᖅ ᐃᓄᓐᓄᑦ ᖃᐅᔨᒪᔭᐅᔭᕆᐊᓕᓐᓂ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᐊᑦᑕᓇᕐᑐᓂᒃ.

ᑕᓪᓕᒪᑦ ᐊᕐᕉᒍᑦ

ᐊᕐᕌᒍᓂ ᓯᕗᓪᓕᕐᐹᓂ ᖃᐅᔨᒪᔭᐅᓂᖃᓚᐅᕐᐳᑦ ᐊᑎᖃᕆᐊᒃᓴᖅ ᐊᔪᖏᓐᓂᖅ ᐊᓪᓚᕕᖓ. ᓄᐃᑕᐅᕋᑖᖅᑎᓪᓗᒍ ᐊᔪᖏᓐᓂᖅ ᐊᓪᓚᕕᒃ 2002,ᒥ, ᐃᖅᑲᓇᐃᔭᕐᑏᑦ ᐳᓚᕋᓚᐅᕐᓯᒪᔪᑦ ᑕᒪᐃᓐᓄᑦ ᑎᓴᒪᓄᑦ ᐃᓄᐃᑦ ᓄᓇᓕᖏᓐᓄᑦ ᐊᕕᒃᑐᑐᕐᓯᒪᔪᓄᑦ ᑲᑎᒪᖃᑎᖃᕆᐊᕐᑐᕐᓱᑎᒃ ᑭᒡᒐᕐᑐᕐᑎᐅᔪᓂᒃ ᖃᐅᔨᓴᓱᐊᕐᓱᑎᒃ ᖃᓄᐃᑦᑐᓂᒃ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᐃᓱᒫᓗᒍᑎᖃᒪᖔᑕ ᐃᓄᐃᑦ. ᑕᒪᒃᑯᐊ ᑲᑎᒪᑎᑦᓯᓂᐅᒪᐅᕐᑐᑦ ᐃᑲᔪᕐᓂᖃᓚᐅᕐᒥᔪᑦ ᖃᐅᔨᒍᑕᐅᓚᐅᕐᒥᔪᑦ ᑖᓐᓇ ᑲᓇᑕᒥ ᑲᑐᔾᔨᖃᑎᒌᖅ ᖃᓄᖅ ᐃᑲᔪᕈᓐᓇᕐᒪᖔᑕᑦ ᓄᓇᓕᓐᓂ ᖃᓂᒪᖃᕐᑕᐃᓕᓂᕐᒧᑦ ᐊᒻᒪ ᖃᓄᐃᖏᑦᓯᐊᕋᓱᐊᕐᓂᕐᒧᑦ ᐱᔾᔪᑎᒋᔭᖏᓐᓂᒃ. ᑕᒪᓐᓇ ᑲᑎᒪᑎᑦᓯᑲᑕᓐᓂᖅ ᐃᑲᔪᕐᓂᖃᓚᐅᕐᑐᖅ ᖃᓄᐃᑦᑐᓂᒃ ᐱᓕᕆᒋᐊᖃᕆᐊᖃᓂᑦᑎᓐᓄᑦ ᐊᕐᕌᒍᓂᐊᕐᑐᓂ ᖃᐃᔪᓂ, ᐃᑲᔪᕐᓯᔭᐅᓪᓗᑎᒃ ᐊᐅᓚᑦᓯᓂᕐᒧᑦ ᑲᑎᒪᔨᕈᓯᓄᑦ ᐊᒻᒪ ᐅᖃᖃᑎᖃᖃᑦᑕᕐᓂᒃᑯᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ. ᑕᒪᒃᑯᐊ ᓴᖅᑭᑕᐅᓯᒪᔪᑦ ᐊᑐᐃᓐᓇᐅᔪᑦ ᐊᔪᖏᓐᓂᒃᑯᑦ ᐊᓪᓚᕕᐊᓂ ᐊᕕᒃᑐᕐᓯᒪᓂᕐᓂ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᑲᑎᒪᓂᓐᓂᖔᕐᑐᑦ 2002,ᒥ.

ᑕᐃᒪᖏᓂᑦ 2002,ᒥᑦ, ᐱᔭᒃᓴᖃᕆᐊᓪᓚᒃᓯᒪᓕᕐᑐᒍᑦ, ᓴᖅᑭᑎᕆᓂᒃᑯᑦ ᐊᓪᓚᕕᒻᒥ ᐱᔾᔪᑎᖃᖅᑐᓂᒃ ᖃᓂᒪᓇᖃᖅᑕᐃᓕᓂᕐᒧᑦ ᐊᒻᒪ ᐃᓅᓯᓕᕆᓂᕐᒧᑦ ᑐᕌᖓᔪᓂᒃ, ᐱᓕᕆᖃᑎᖃᖅᓱᑕ ᐊᒥᓱᓂᒃ ᐃᓄᐃᑦ ᓄᓇᓕᖏᓐᓂᒃ ᐊᒻᒪ ᑲᑐᔾᔨᖃᑎᒌᓂᒃ. ᐅᒃᑐᐱᕆ 2008,ᒥ ᐊᓯᔾᔨᓚᐅᕐᑕᕗᑦ ᐊᓪᓚᕕᑦᑕ ᐊᑎᖓ ᐃᒃᐱᒍᓱᓐᓂᕐᓴᐅᒍᒪᓪᓗᑕ ᐃᓄᓐᓄᐊᖓᔪᓂᒃ ᐋᓐᓂᐊᖃᖅᑕᐃᓕᓂᓕᕆᓂᕐᒧᑦ ᐊᒻᒪ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᐱᔾᔪᑎᓖᑦ. ᓄᑖᒥᒃ ᐊᑎᖃᓕᖅ ᐊᓪᓚᕕᕗᑦ ᐆᒥᖓ ᐃᓄᐃᑦ ᑐᑦᑕᕐᕕᖓᑦ ᐃᓗᐊᓂ ᑲᓇᑕᒥ ᓄᓇᖃᖅᑳᖅᓯᒪᔪᑦ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᑲᑐᔾᔨᖃᑎᒌᖓᑕ.

ᐃᓄᐃᑦ ᑐᑦᑕᕐᕕᖓᒍᑦ ᐱᓕᕆᐊᖃᖅᓯᒪᓕᕐᑐᑦ ᐊᒥᓱᓂᒃ ᐊᔾᔨᒌᖏᑦᑐᓂᒃ ᐊᕐᕌᒍᓂ, ᑕᒪᒃᑯᓂᖓ ᐃᓱᒪᒃᑯᑦ ᐊᕐᓱᕈᕈᑕᐅᔪᓂᒃ/ᐃᒥᐊᓗᒻᒧᑦ ᐋᖓᓇᕐᑐᓄᓪᓗ ᐊᔪᕆᓯᒪᓂᕐᒥᒃ, ᐃᕐᓂᓱᒃᓰᓂᕐᒥᒃ ᐊᒻᒪ ᓱᕈᓯᕐᓂᒃ ᒪᒃᑐᑦᑐᓂᓪᓗ ᐱᔾᔪᑎᖃᖅᑐᓂᒃ ᐊᒻᒪ ᖃᓄᐃᖏᑦᓯᐊᕋᓱᐊᕐᓂᓕᕆᓂᕐᒧᑦ ᐃᖅᑲᓇᐃᔮᒃᓴᓂᒃ, ᐃᓕᓐᓂᐊᕐᓂᓕᕆᓂᕐᒥᒃ ᐊᒻᒪ ᓯᓚᐅᑉ ᐊᓯᔾᔨᕐᐸᓪᓕᐊᓂᐊᑕ ᒥᒃᓵᓄᑦ. ᑐᑭᓯᒋᐊᓪᓚᒐᒃᓴᐃᑦ ᖃᓄᐃᓘᕐᐸᒻᒪᖔᑦᑕ ᐅᕘᓇ >>