ᐅᕙᑦᑎᓐᓂᒃ ᐱᔾᔪᑎᓕᒃ

ᐊᔪᙱᓂᖅ (ᐃᓄᐃᑦ) ᐱᓕᕆᕝᕕᖓᑦ Ajunnginiq (Inuit) Centre

Inuit Tuttarvingat Pijut Canadalimâmi NunaKakKâsimajuit Kanuittailinimmut katutjiKatigenga Tugâgutik Pannaigutik 2010-15

ᐃᓄᐃᑦ ᑐᑦᑕᕐᕕᖓᑦ ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᐋᓐᓂᐊᓇᓐᖏᓐᓂᓕᕆᓂᕐᒧᑦ ᑲᑐᔾᔨᖃᑎᒌᖏᑕᐅᐸᓗᖓᐃᔭᐅᑎᖏᓐᓄᑦ ᐸᕐᓇᐅᑎᑦ 2010-15

wkw5 g5b[z5 WNh{[dtQ/sJ6 vNbu kNogò5 ckw1qyxExc3i6 W9lA WNh{[sÔ2 grjxQx5yxDt5nq5b X3âbsymstq5 @)!)-!%

Quliam hivuninga: Inuit Tuttarvingat ataulugu nuna tangungitchuat anniaqtualiqinikun katimaringit hivuningat 2010min 15mun

ᐱᓕᕆᕝᕕᖁᑎᒋᔭᑦᑕ ᐊᑎᖓ, ᐊᔪᙱᓂᖅ, ᑐᑭᖃᖅᐳᖅ ᐊᔪᖏᓐᓂᕐᒥᒃ ᖃᐅᔨᒪᓂᕐᒥᓪᓗ ᐃᓄᒃᑎᑐᑦ.

ᐊᔪᙱᓂᖅ ᐃᓄᖕᓅᖓᓪᓗᓂ ᐱᓕᕆᕝᕕᐅᕗᖅ ᐊᐅᓚᑕᐅᓪᓗᓂ ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᑐᔾᔨᖃᑎᒌᒃᑯᖏᓐᓂᑦ (NAHO). ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᑐᔾᔨᖃᑎᒌᒃᑯᖏᑦ ᑐᕌᒐᖃᖅᐳᑦ ᓄᓇᖃᖅᑳᖅᓯᒪᔪᑦ ᐃᓗᓯᖓᑦ ᖃᓄᐃᖏᑦᑎᐊᕋᓱᐊᕐᓂᖓᓪᓗ ᐱᐅᓯᕚᓪᓕᖅᑎᑕᐅᖁᓪᓗᒍ ᖁᕝᕙᕆᐊᖅᑎᑕᐅᓇᓱᐊᕐᓗᓂᓗ ᖃᐅᔨᒪᔭᐅᔪᑎᒍᑦ ᖃᓄᐃᓕᐅᖅᑎᑦᑎᓗᑎᒃ, ᓲᕐᓗ:

• ᐅᓂᒃᑳᓕᐊᓂᒃ ᓴᖅᑭᑎᕆᓂᖅ
• ᖃᐅᔨᓴᖅᑎᑦᑎᓂᖅ
• ᐅᓂᒃᑳᓕᐅᕐᓂᖅ
• ᑲᑎᒪᕕᔾᔪᐊᖅᑎᑦᑎᓂᖅ
• ᑐᑭᓯᒋᐊᖁᑎᒃᓴᓂᒃ ᑐᓴᐅᒪᑎᑦᑎᓂᖅ.

ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᑐᔾᔨᖃᑎᒌᒃᑯᖏᓐᓂ, ᐱᓕᕆᐊᖓᑦ ᐊᒃᑐᐊᖓᔪᖅ ᐃᓄᐃᑦ ᐃᓗᓯᖏᓐᓄᑦ ᖃᓄᐃᖏᑦᑎᐊᕆᐊᖃᕐᓂᖏᓐᓄᓪᓗ ᑲᒪᒋᔭᐅᕙᒃᐳᖅ ᐊᔪᙱᓐᓂᒃᑯᓐᓂᑦ.

ᐊᔪᙱᓂᖅ ᓱᓕᓂᐊᕐᓂᕋᕈᑎᖃᖅᓯᒪᕗᖅ ᐃᓄᐃᑦ ᓄᓇᓕᖏᓪᓗ ᑎᒥᒃᑯᑦ, ᐃᓄᓕᕆᓂᒃᑯᑦ, ᐃᒃᐱᖕᓂᐊᓂᒃᑯᑦ ᐃᓗᓯᖏᓪᓗ ᐱᐅᓯᕚᓪᓕᖅᑎᑕᐅᖁᓪᓗᒋᑦ. ᐱᓕᕆᕝᕕᐅᔪᖅ ᖁᕝᕙᕆᐊᖅᑎᑦᑎᓇᓱᐊᖃᑦᑕᕐᐳᖅ ᓯᕗᒧᐊᒃᑎᑦᑎᓂᕐᒥᒃ ᖃᐅᔨᒪᓂᕆᔭᐅᔪᓂᓪᓗ ᑐᓴᐅᒪᑎᑦᑎᓂᕐᒥᒃ ᐃᓄᐃᑦ ᐋᓐᓂᐊᖃᕐᓇᖏᑦᑐᓕᕆᓂᐅᔪᓄᑦ ᑲᓇᑕᒥ.

ᑕᐅᑐᒐᖃᕐᓂᖅ

ᐊᔪᙱᓂᖅ ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᑐᔾᔨᖃᑎᒌᒃᑯᖏᑕ ᐊᔪᙱᓂᖅ ᐱᓕᕆᕝᕕᐊ ᖁᕝᕙᕆᐊᖅᑎᑦᑎᓇᓱᐊᖃᑦᑕᖅᐳᖅ ᐱᓕᒻᒪᒃᓴᖅᑕᐅᕙᒃᑐᓂᒃ ᐃᓄᐃᑦ ᐃᓅᓯᑦᑎᐊᕆᕆᐊᖃᕐᓂᖓ ᐅᑎᖅᑎᑕᐅᖁᓪᓗᒍ ᐊᒻᒪᓗ ᐃᓄᐃᑦ ᐃᓗᓯᕆᔭᖏᑦ ᐱᐅᓯᕚᓪᓕᖅᑎᑕᐅᖁᓪᓗᒍ, ᖃᐅᔨᓴᕐᓂᒃᑯᑦ ᐊᒻᒪᓗ ᖃᐅᔨᓴᖅᑎᑦᑎᕙᓪᓕᐊᓂᒃᑯᑦ, ᐃᓕᓐᓂᐊᖅᑎᑦᑎᓂᒃᑯᑦ, ᐅᔾᔨᕈᓱᓕᖅᑎᑦᑎᓂᒃᑯᑦ, ᐃᖅᑲᓇᐃᔭᖅᑐᓕᕆᓂᒃᑯᓪᓗ ᐊᒻᒪᓗ ᑐᑭᓯᒋᐊᕈᑎᒃᓴᓂᒃ ᑐᓴᐅᒪᑎᑦᑎᓂᖅ ᐃᓄᖕᓅᖓᔪᓂᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᑐᐊᒐᓂᒃ ᐱᓕᒻᒪᒃᓴᖅᑕᐅᕙᒃᑐᓂᓪᓗ.

ᐱᓕᕆᐊᒃᓴᐃᑦ

ᐊᔪᙱᓂᖅ

ᑕᓪᓕᒪᑦ ᐃᒃᐱᒋᓪᓗᐊᑕᖅᑕᖏᑦ:

• ᐱᐅᓯᕚᓪᓕᖅᑎᑦᑎᓗᑎᒃ ᖁᕝᕙᕆᐊᖅᑎᑦᑎᓇᓱᐊᕐᓗᑎᓪᓗ ᐃᓄᐃᑦ ᐃᓗᓯᖏᓐᓂᒃ ᖃᐅᔨᒪᓂᑐᖃᕆᔭᐅᔪᑎᒍᑦ ᖃᓄᐃᓕᐅᖅᑎᑦᑎᓂᐅᔪᓂᒃ;
• ᑐᑭᓯᐅᒪᓕᖅᑎᑦᑎᓇᓱᐊᕐᓗᑎᒃ ᐃᓗᓯᕆᔭᐅᔪᓂᒃ ᐃᓄᖕᓂᑦ ᐊᒃᑐᐃᔭᐅᔾᔪᑎᐅᓯᒪᔪᓄᑦ;
• ᖃᐅᔨᓴᖅᑎᑦᑎᓗᑎᒃ ᖃᐅᔨᓴᖅᐸᓪᓕᐊᑎᑦᑎᓇᓱᐊᕐᓗᑎᓪᓗ ᐊᒻᒪᓗ ᓴᖅᑭᑎᕆᓗᑎᒃ ᖃᐅᔨᓴᖃᑎᒋᔭᐅᒐᔭᖅᑐᓂᒃ;
• ᐃᓄᖕᓂᒃ ᐃᓚᐅᓂᖃᓕᖅᑎᑦᑎᓗᑎᒃ ᐋᓐᓂᐊᖃᕐᓇᖏᑦᑐᓕᕆᖃᑦᑕᕐᓂᕐᒧᑦ; ᐊᒻᒪᓗ,
• ᓇᓗᓇᐃᖅᓯᓗᑎᒃ ᓴᐳᒻᒥᑦᑎᓗᑎᓪᓗ ᐃᓄᐃᑦ ᒪᒥᓴᐃᔾᔪᓯᑐᖃᕆᔭᖏᓐᓂᒃ.

ᐱᓕᕆᖃᑎᒌᒃᑐᑦ

ᐊᔪᙱᓂᖅ ᖁᓕᐅᙱᓱᖓᖅᑐᓂᒃ ᐃᖅᑲᓇᐃᔭᖅᑎᖃᐅᖅᐳᖅ ᖃᐅᔨᒪᔨᑕᐅᓪᓗᑎᒃ ᐅᑯᓇᓂ:

• ᐃᓄᐃᑦ ᐃᓗᓯᖏᓐᓂᒃ ᖃᓄᐃᖏᑦᑎᐊᕆᐊᖃᕐᓂᖏᓐᓄᓪᓗ
• ᐊᑐᐊᒐᓂᒃ ᖃᐅᔨᓴᖅᐸᓪᓕᐊᓂᖅ ᐊᒻᒪᓗ ᖃᐅᔨᓴᐃᓂᖅ
• ᐃᓕᓐᓂᐊᕐᓂᓕᕆᓂᖅ ᐊᒻᒪᓗ ᐱᓕᒻᒪᒃᓴᐃᓂᖅ
• ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᔾᔪᑎᒃᓴᐅᔪᓂᒃ, ᓲᕐᓗ ᐃᒻᒥᓃᖅᑕᐃᓕᒪᑎᑦᑎᓂᖅ ᐊᒻᒪᓗ ᐃᓱᒪᒃᑯᑦ ᖃᓄᐃᖏᑦᑎᐊᕆᐊᖃᕐᓂᖅ, ᐃᒥᐊᓗᒻᒥᒃ ᑕᕝᕚᑭᓂᓪᓗ ᐊᑐᖃᑦᑕᕐᓂᖅ, ᐊᕙᑎᓕᕆᓂᖅ ᓯᓚᐅᓪᓗ ᐊᓯᔾᔨᖅᐸᓪᓕᐊᓂᖓᓂᒃ, ᐱᕙᓪᓕᐊᔪᓕᕆᓂᖅ, ᐃᓕᓐᓂᐊᕐᓂᓕᕆᓂᖅ, ᐃᑲᔪᖃᑦᑕᕐᓂᖅ, ᐊᕐᓇᐃᑦ ᒪᒃᑯᒃᑐᓪᓗ, ᓴᐳᒻᒥᑦᑎᓂᖅ ᒪᒥᓴᕈᓯᑐᖃᕐᓂᒃ, ᓴᓇᔭᐅᕙᒃᑐᑦ ᐱᖁᑎᒋᔭᐅᔪᓄᑦ ᐱᔪᓐᓇᐅᑎᓂᒃ ᐊᓯᖏᓐᓂᓪᓗ.

ᐊᐅᓚᑦᑎᓂᕐᒧᑦ ᑲᑎᒪᔨᕋᓛᑦ:

ᐊᔪᙱᓂᖅ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᖏᓐᓂ ᒪᕐᕈᐃᓂᒃ ᐊᐅᓚᑦᑎᔩᑦ ᑲᑎᒪᔨᖁᑎᖃᖅᐳᑦ ᑎᒃᑯᐊᖅᑕᐅᓯᒪᓪᓗᑎᒃ ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ, ᐊᑕᐅᓯᖅ ᐃᓚᒋᔭᐅᔪᖅ ᓂᕈᐊᒐᒃᓴᙳᖅᑎᑕᐅᓯᒪᓪᓗᓂ ᐊᑐᓂ ᑎᓴᒪᐃᑦ ᓄᓇᑖᖅᓯᒪᔪᑦ ᑲᑐᔾᔨᖃᑎᒌᒃᑯᖏᓐᓂᑦ, ᐊᒻᒪᓗ ᐊᑕᐅᓯᖅ ᐃᓚᒋᔭᐅᔪᖅ ᓂᕈᐊᒐᒃᓴᙳᖅᑎᑕᐅᓯᒪᓪᓗᓂ ᐸᐅᒃᑑᑎᒃᑯᓐᓂᑦ ᐃᓄᐃᑦ ᐊᕐᓇᐃᑦ ᑲᓇᑕᒥ.

ᐃᓚᒋᔭᐅᓕᖅᓯᒪᔪᑦ ᐊᔪᙱᓂᖅ ᐊᐅᓚᑦᑎᓂᕐᒧᑦ ᑲᑎᒪᔨᕋᓛᖏᓐᓂᑦ:

• ᑳᑐᕆᓐ ᒥᓂᒃ, ᐃᒃᓯᕙᐅᑕᖅ (ᑎᒃᑯᐊᖅᑕᐅᓯᒪᔪᑦ ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ)
• ᐋᓂ ᐸᑲᓐ (ᑎᒃᑯᐊᖅᑕᐅᓯᒪᔪᖅ ᐸᐅᒃᑑᑎᒃᑯᓐᓂᑦ)
• ᐋᓂ ᒎᔅ (ᑎᒃᑯᐊᖅᑕᐅᓯᒪᔪᖅ ᐃᓅᕕᐊᓗᐃᑦ ᑯᐊᐳᕇᓴᒃᑯᖏᓐᓂᑦ)
• ᓕᐅᕆ ᒍᐊᑕᓐ (ᑎᒃᑯᐊᖅᑕᐅᓯᒪᔪᖅ ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ)
• ᒥᐅᕆᐊᒻ ᓚᐃᔪᓪ (ᑎᒃᑯᐊᖅᑕᐅᓯᒪᔪᖅ ᓛᐸᑐᐊᕆᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᑦ)
• ᔩᓂ ᒪᐃ (ᑎᒃᑯᐊᖅᑕᐅᓯᒪᔪᖅ ᓄᓇᕕᒃ ᓄᓇᓕᓕᒫᑦ ᐃᓗᓯᓕᕆᓂᕐᒥ ᐱᒍᑦᔨᓂᕐᓄᑦ ᑲᑎᒪᔨᖏᓐᓂᑦ)
• ᑳᓖᓐ ᐋᕆᐊᒃ (ᑎᒃᑯᐊᖅᑕᐅᓯᒪᔪᖅ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂᑦ)

ᐊᐅᓚᑦᑎᓂᕐᒧᑦ ᑲᑎᒪᔨᕋᓛᖏᑦ ᐃᖅᑲᓇᐃᔭᖅᑎᐅᔪᓪᓗ ᐊᔪᙱᓂᖅ ᐱᓕᕆᕝᕕᖓᓂ ᐃᓄᖕᓅᖓᔪᓂᒃ ᐃᓗᓯᓕᕆᓂᕐᒧᑦ ᑐᑭᓯᒋᐊᕈᑎᒃᓴᖃᑦᑎᐊᕋᓗᐊᕐᒪ1ᑕ ᐱᑕᖃᖅᑎᑦᑎᖁᔨᕗᑦ ᐊᕕᒃᑐᖅᓯᒪᓂᐊᓃᑦᑐᓂᑦ ᓄᓇᓕᐅᔪᓂᓪᓗ ᐱᔭᐅᔭᕆᐊᓕᖕᓄᑦ ᐊᑐᓕᕈᓐᓇᖅᑐᓂᒃ.

ᐊᔾᔨᙳᐊᖅ

2004 ᐅᑭᐊᒃᓵᖓᓂ, ᐊᔪᙱᓂᖅ ᓴᖅᑭᑦᑎᓚᐅᕐᒪᑦ ᓄᑖᖅ ᑕᑯᒃᓴᐅᓂᕆᓕᖅᑕᖓᓂᒃ – ᐱᒻᒪᕆᐅᑎᑦᑎᔪᖅ ᐊᔪᙱᓂᖅ ᐃᒃᐱᓪᓗᐊᑕᖅᑕᖏᓐᓂᒃ ᐃᓄᐃᑦ ᐃᓗᓯᖏᓐᓂᒃ ᖃᓄᐃᖏᑦᑎᐊᕆᐊᖃᕐᓂᖏᓐᓄᓪᓗ.

ᓄᑖᖅ ᑕᐅᑦᑐᒋᓕᖅᑎᑕᖓ ᑕᑯᒃᓴᐅᑎᑦᑎᓪᓗᓂ ᓯᕿᓂᐅᑉ ᐊᕙᓗᖓᓂᒃ, ᐊᔾᔨᙳᐊᖅ ᑖᓐᓇ ᐊᔾᔨᐅᙱᐅᔭᖅᑐᖅ ᐅᑭᐅᖅᑕᖅᑑᑉ ᓯᓚᖓᓂ, ᐊᒻᒪᓗ ᓇᓗᓇᐃᖅᓯᑦᑎᐊᖅᐳᖅ ᐊᔪᙱᓂᖅ ᐱᓕᕆᕝᕕᐅᔪᒥᒃ. ᓯᕿᓂᐅᑉ ᐊᕙᓗᖓ ᑎᑎᕋᔭᖅᑕᐅᓯᒪᑦᑎᐊᖅᐳᖅ ᑕᑯᒃᓴᐅᑎᑦᑎᓪᓗᓂ ᐊᑕᖏᖅᑐᒥᒃ ᑕᐅᑐᒐᕆᔭᐅᔪᑦ ᐃᓄᖕᓂᒃ ᐊᒻᒪᓗ ᑭᒡᒐᖅᑐᐃᓂᖃᖅᐳᖅ ᕿᑎᖓᓃᑦᑐᒥᒃ ᓯᕗᓕᖅᑎᐅᓪᓗᓂ ᐃᓄᐃᑦ ᐃᓗᓕᕆᓂᖓᓄᑦ ᖃᐅᔨᒪᓂᕐᒥᒃ.

ᑕᖅᓴᖏᑦ ᓇᓗᓇᐃᒃᑯᑕᕆᔭᑦᑎᓐᓂ ᑕᑯᒃᓴᐅᒐᔪᒃᐳᑦ ᐅᑭᐅᖅᑕᖅᑑᑉ ᐊᕙᑎᖓᓂ. ᑐᖑᔪᖅᑐᖅ ᖃᑯᖅᑕᕐᓗ ᓯᕿᓂᐅᑉ ᐊᕙᓗᖓᑕ ᑐᓂᐊᓃᑦᑑᒃ ᑭᒡᒐᖅᑐᐃᓂᖃᖅᐳᖅ ᐃᒪᕐᒥᒃ ᐊᐳᒻᒥᓪᓗ, ᑕᑯᒃᓴᐅᓂᖃᓪᓗᐊᑕᖅᐸᒃᑐᖅ ᐅᑭᐅᖅᑕᖅᑑᑉ ᐊᕙᑎᖓᓂ. ᐊᐅᐸᔮᖓᔪᖅ, ᐅᕝᕙᓗ ᕿᕐᓈᖓᔪᖅ ᐊᐅᐸᔮᖓᔪᖅ, ᑕᖅᓴᖓ ᑕᑯᒃᓴᐅᓂᖃᖅᑎᑦᑎᓪᓗᓂ ᐅᑭᐅᖅᑕᖅᑑᑉ ᓯᓚᖓᓂᒃ ᑖᖅᓯᕙᓪᓕᐊᓕᖅᑎᓪᓗᒍ. ᐆᔭᐅᔭᖅ ᓇᓗᓇᐃᒃᑯᑎᐅᓪᓗᓂ ᐅᑭᐅᖅᑕᖅᑑᑉ ᓄᓇᐃᓐᓇᖓᓂᒃ ᑎᖓᐅᔭᓂᓪᓗ.

ᓴᖅᑭᑦᑎᓯᒪᒋᕗᒍᑦ ᓴᙱᔪᒥᒃ ᑭᓯᐊᓂ ᑐᑭᓯᒐᕐᓂᖅᑐᒥᒃ ᐅᖃᐅᓯᒃᓴᒥᒃ ᑕᑯᒃᓴᐅᓂᖃᖅᑎᑦᑎᔪᖅ ᐊᔪᙱᓂᖅ ᐱᓕᕆᕝᕕᐅᔪᒥᒃ. ᐅᖃᐅᓰᑦ “ᖃᐅᔨᒪᓂᖅ ᖃᓄᐃᖏᑦᑎᐊᖅᑐᖅ ᓄᓇᓕᐅᔪᒥᒃ” ᐅᖃᐅᓯᖃᖅᐳᖅ ᐊᔪᙱᓂᖅ ᐱᓇᓱᐊᖅᓯᒪᔭᖓᓄᑦ ᑐᑭᖓᓂᓪᓗ:

• ᖃᐅᔨᒪᓂᖅ – ᓴᙱᔪᓂᒃ ᐃᓄᖕᓅᖓᔪᓂᒃ ᖃᐅᔨᒪᓂᖃᕆᐊᖃᕋᑦᑕ, ᓇᓗᓇᐃᕈᑎᒃᓴᖃᕆᐊᖃᖅᐳᒍᓪᓘᓐᓃᑦ, ᓴᖅᑭᑦᑎᓗᑕ ᐊᑐᐊᒐᓂᒃ, ᐱᓕᕆᐊᒃᓴᓂᒃ ᐱᔨᑦᑎᕋᕈᑎᓂᓪᓗ ᐃᓄᖕᓂᑦ, ᐃᓚᒌᓂᑦ ᓄᓇᓕᐅᔪᓂᓪᓗ ᐱᔭᐅᔭᕆᐊᓖᑦ ᐊᑐᓕᖅᑎᑕᐅᔪᓐᓇᖁᓪᓗᒋᑦ. ᐊᔪᙱᓂᖅ ᐱᓕᕆᖃᑎᖃᑦᑎᐊᖅᐸᒃᐳᖅ ᐊᓯᖏᓐᓂᒃ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ ᓴᖅᑭᑦᑎᔪᓐᓇᖁᓪᓗᒋᑦ ᖃᐅᒪᔨᓂᕐᒥᒃ ᐊᒻᒪᓗ ᖃᐅᔨᒪᓂᕆᔭᐅᔪᑎᒍᑦ ᖃᓄᐃᓕᐅᕐᓂᐅᔪᓂᒃ ᑕᒪᒃᑯᐊ ᐱᐅᓯᕚᓪᓕᕈᑎᐅᓕᕈᓐᓇᖅᑐᑦ ᖃᓄᐃᓕᖓᓂᕆᔭᐅᔪᓂᑦ ᐃᓄᐃᑦ ᐃᓗᓯᖏᑦ ᖃᓄᐃᖏᑦᑎᐊᕆᐊᖃᕐᓂᖏᓪᓗ ᐃᑲᔪᖅᑕᐅᖁᓪᓗᒋᑦ.
• ᖃᓄᐃᖏᑦᑎᐊᕐᓂᖅ – ᐊᔪᙱᓂᖅ ᐃᓕᓴᖅᓯᕗᖅ ᐱᒻᒪᕆᐅᓂᖓ ᐅᖃᐅᓯᖃᕐᓂᕐᒧᑦ ᐃᓱᒪᒧᑦ, ᑎᒥᒃᑯᑦ, ᐱᖅᑯᓯᑎᒍᑦ ᐊᒻᒪᓗ ᑕᕐᓂᐅᑉ ᐃᓚᒋᔭᖏᓐᓂᒃ ᐃᓗᓯᕐᒥ ᖃᓄᐃᖏᑦᑎᐊᕆᐊᖃᕐᓂᕐᒥᓗ. ᐃᑲᔪᖅᓱᐃᓂᖅ ᐱᖅᑯᓯᑦᑎᓐᓂᒃ, ᐅᖃᐅᓯᑦᑎᓐᓂᒃ, ᐊᕙᑎᑦᑎᓐᓂᒃ, ᓂᕿᓪᓚᕆᑦᑎᓐᓂᒃ ᖃᓄᐃᓕᐅᕐᓂᕆᕙᒃᑕᑦᑎᓐᓂᓪᓗ ᐊᓂᒍᐃᔾᔪᑕᐅᓇᓱᓪᓗᐊᑕᖅᐳᑦ ᐃᓗᓯᖅ ᐱᔾᔪᑎᒋᓪᓗᒍ ᐊᔾᔨᒌᓐᓂᕐᓯᐅᕐᓂᒃᑯᑦ ᑭᒃᑯᑐᐃᓐᓇᕐᓄᑦ ᑲᓇᑕᒥᐅᑕᐅᔪᓂᒃ.
• ᓄᓇᓖᑦ – ᐅᖃᐅᓯᖃᕐᓂᖅ ᐱᔾᔪᑎᐅᓕᖅᓯᒪᔪᓂᑦ ᐃᓗᓯᕐᒧᑦ, ᓲᕐᓗ ᐃᒡᓗᓕᕆᓂᖅ, ᐱᕙᓪᓕᐊᔪᓕᕆᓂᖅ ᐊᒻᒪᓗ ᓇᒻᒥᓂᖅ ᓇᓗᓇᐃᖅᓯᓂᖅ, ᐃᓚᒋᔭᐅᓪᓗᐊᑕᖅᐳᖅ ᐱᐅᓯᕚᓪᓕᖅᑎᑦᑎᒐᔭᕐᓂᕐᒥᒃ ᐃᓄᐃᑦ ᐃᓗᓯᖏᓐᓂᒃ ᖃᓄᐃᖏᑦᑎᐊᕆᐊᖃᕐᓂᖏᓐᓂᓪᓗ. ᐃᓄᖕᓅᖓᔪᑦ ᐋᖅᑭᒋᐊᕈᑎᒃᓴᐃᑦ ᐃᓚᓕᐅᑎᓯᒪᑦᑎᐊᕆᖃᖅᐳᑦ ᐱᖅᑯᓯᑦᑎᓐᓂ ᐱᒻᒪᕆᐅᔪᖁᑎᑦᑎᓐᓄᑦ ᐱᓕᒻᒪᒃᓴᖃᑦᑕᖅᑕᑦᑎᓐᓂᓗ ᐊᑐᓕᖅᑎᑦᑎᕙᓪᓕᐊᑎᓪᓗᑕ ᓇᓗᓇᐃᖅᓯᔾᔪᑎᑦᑎᐊᕙᐅᔪᑦ ᐱᓕᒻᒪᒃᓴᕐᓂᐅᕙᒃᑐᓪᓗ ᐊᓯᖏᓐᓄᑦ ᐱᐅᓯᐅᔪᓄᑦ. ᓱᓕᓂᐊᕐᓂᕋᕈᑎᒋᓯᒪᔭᕗᑦ ᐃᓄᐃᑦ ᐱᒻᒪᕆᐅᔪᖁᑎᖏᓐᓄᑦ ᑐᑭᖃᕆᕗᖅ ᐅᖃᐅᓯᖃᕆᐊᖃᕐᓂᑦᑎᓐᓂᒃ ᑖᒃᑯᓂᖓ ᓇᓗᓇᖅᑐᑦ ᐱᔾᔪᑎᒃᓴᐅᔪᓂᒃ ᐃᓚᒌᑦ ᓄᓇᓕᐅᔪᓪᓗ ᐃᓗᓕᖏᓐᓃᑦᑐᓂᒃ.