ᐃᓄᐃᑦ ᐊᒻᒪᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᖅᑲᓇᐃᔮᒃᓴᑦ
ᐱᒻᒪᕆᐅᕗᖅ ᐃᓄᐃᑦ ᓇᖕᒥᓂᖅ ᐋᓐᓂᐊᖃᕐᓇᖏᑦᑐᓕᕆᔨᖃᖔᓕᖅᐸᑕ. ᒫᓐᓇᐅᔪᒥ, ᑕᒪᕐᒥᐸᓗᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᖅᑲᓇᐃᔭᖅᑎᐅᔪᑦ ᐃᖅᑲᓇᐃᔭᖅᑎᑕᐅᔭᕆᐊᖃᖃᑦᑕᕐᒪᑕ ᖃᓪᓗᓈᓂᓐᖔᖅᓯᒪᔪᓂᑦ. ᑕᒪᓐᓇ ᐃᒪᐃᓕᔾᔪᑕᐅᔪᓐᓇᖅᐳᖅ ᐅᑯᓇᓂ:
- ᑐᑭᓯᐅᒪᖃᑦᑕᐅᑎᖏᓪᓗᑎᒃ ᐱᑕᖃᖅᑎᑦᑎᔨᐅᔪᑦ ᐊᒻᒪᓗ ᐋᓐᓂᐊᕕᓕᐊᖅᓯᒪᔪᑦ;
- ᐃᓇᖏᖅᑕᐅᔭᕆᐊᖃᒐᔪᓪᓗᑎᒃ;
- ᑕᑎᒋᔭᐅᖏᓪᓗᑎᒃ, ᐊᒻᒪᓗ;
- ᐊᓯᖏᑦ ᐱᔾᔪᑎᒃᓴᐃᑦ ᓴᖅᑭᑉᐸᓪᓕᐊᔪᑦ ᐊᔾᔨᒌᖏᓐᓂᖏᓐᓄᑦ ᐅᖃᐅᓯᒃᑯᑦ ᐱᖅᑯᓯᒃᑯᓪᓗ.[1]
ᐱᒡᒐᓇᕈᑎᒋᔭᐅᕙᒃᑐᖅ ᐅᑭᐅᖅᑕᖅᑐᒥ ᓄᓇᖃᕐᓂᕐᒧᑦ ᐊᑐᐃᓐᓇᖅᑕᖃᙱᓗᐊᕐᓂᖓᓄᑦ ᐃᓕᓐᓂᐊᒐᒃᓴᓂᒃ ᐱᓕᒻᒪᒃᓴᖅᑕᐅᔾᔪᑎᒃᓴᓪᓗ. ᐊᕕᒃᑐᖅᓯᒪᓂᐊᓃᑦᑐᓂᒃ ᓯᓚᑦᑐᖅᓴᕐᕕᒃᑕᖃᐅᖅᐳᖅ ᐅᑭᐅᖅᑕᖅᑐᒥ, ᓲᕐᓗ ᐃᖃᓗᐃᑦ, ᕼᐊᐱ ᕚᓕ-ᒎᔅ ᐸᐃ ᐊᒻᒪᓗ ᐃᓅᕕᒃ, ᑭᓯᐊᓂ ᐊᒥᓱᑦ ᐃᓄᐃᑦ ᐃᓕᓐᓂᐊᖅᑎᐅᔪᑦ ᐊᖏᕐᕋᕆᔭᒥᖕᓂᑦ ᐊᐅᓪᓚᕆᐊᖃᖃᑦᑕᕐᒪᑕ ᓯᓚᑦᑐᖅᓴᕐᕕᖕᓄᑦ ᐃᓕᓐᓂᐊᕆᐊᕐᓗᑎᒃ.
ᐃᓄᐃᑦ ᐱᓇᓱᐊᒐᒃᓴᐅᔪᓂᒃ ᐱᔭᕆᐊᖃᖅᐳᑦ ᐊᒻᒪᓗ ᖃᐅᔨᒪᓂᖃᕆᐊᖃᖅᐳᑦ ᑕᒪᒃᑯᐊ ᐱᔪᓐᓇᖁᓪᓗᓂᔾᔪᒃ ᐋᓐᓂᐊᖃᕐᓇᖏᑦᑐᓕᕆᓂᕐᒥ.
ᐊᒥᓱᓂᒃ ᐃᖅᑲᓇᐃᔮᒃᓴᖅᑕᖃᐅᖅᐳᖅ ᐋᓐᓂᐊᖃᕐᓇᖏᑦᑐᓕᕆᓂᕐᒥ ᐊᓯᖏᓐᓂᒃ ᓘᒃᑖᖑᓂᕐᒧᑦ ᐋᓐᓂᐊᓯᐅᖅᑎᐅᓂᕐᒧᓪᓘᓐᓃᑦ ᑕᒃᑯᐊ ᐱᐅᓯᕚᓪᓕᖅᑎᑦᑎᒐᔭᖅᑐᑦ ᐃᓄᐃᑦ ᐃᓗᓯᖏᓐᓂᒃ ᖃᓄᐃᖏᑦᑎᐊᕆᐊᖃᕐᓂᕆᔭᖏᓐᓂᓪᓗ ᐅᑭᐅᖅᑕᖅᑐᒥ, ᓲᕐᓗ ᑭᒍᓯᕆᔩᑦ, ᓄᓇᓕᖕᓂ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑭᒡᒐᖅᑐᐃᔩᑦ, ᖃᐅᑕᒫᖅᓯᐅᑎᓄᑦ ᐊᑐᕆᐊᖃᖅᑕᐅᔪᓂᒃ ᐱᔭᕆᐅᖅᓴᐃᔩᑦ, ᐊᓯᕈᓗᐃᔭᖏᓪᓗ.
ᐊᔪᙱᓂᖅ (ᐃᓄᐃᑦ) ᐱᓕᕆᕝᕕᖓ ᑐᑭᓯᒋᐊᕈᑎᒃᓴᖃᖅᑎᑦᑎᓯᒪᕗᖅ ᐊᔾᔨᒌᙱᕈᓗᐃᔭᖅᑐᑦ ᐋᓐᓂᐊᖃᕐᓇᖏᑦᑐᓕᕿᓂᕐᒥ ᐃᖅᑲᓇᐃᔮᒃᓴᐅᒐᔭᖅᑐᓂᒃ ᑕᒪᒃᑯᐊ ᐃᓄᖕᓂᑦ ᐱᔭᐅᔪᒪᑐᐃᓐᓇᕆᐊᓖᑦ ᐊᒻᒪᓗ ᐃᓕᓐᓂᐊᒐᒃᓴᐅᒐᔭᖅᑐᓂᒃ ᑕᒪᒃᑯᐊ ᐊᒃᑐᐊᓂᖃᖅᑐᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᖅᑲᓇᐃᔮᒃᓴᐅᔪᓄᑦ ᐃᓕᓐᓂᐊᕐᔪᐊᖅᓯᒪᓂᐅᔪᓄᓪᓗ.
ᖃᐃᒋᑦᓯ! ᐋᓐᓂᐊᖃᕐᓇᖏᑦᑐᓕᕆᓂᕐᒥ ᐃᖅᑲᓇᐃᔮᒃᓴᑦ ᖁᕕᐊᓇᕈᓗᐃᔭᖅᑐᒻᒪᕆᐊᓘᕗᑦ!
ᐊᔪᙱᓂᖅ ᓴᖅᑭᑦᑎᓯᒪᕗᖅ ᖃᕋᓴᐅᔭᒃᑯᑦ ᐊᒻᒪᓗ ᕿᓪᓕᖅᑐᒥᒃ ᓂᐱᒃᓴᔭᒥᒃ ᑐᑭᓯᒋᐊᕈᑎᒃᓴᓂᒃ ᐃᓗᓯᕐᒧᑦ ᐊᒃᑐᐊᓂᖃᖅᑐᓂᒃ ᐃᓕᓐᓂᐊᕐᓂᓕᕆᓂᕐᒥᒃ ᐊᒻᒪᓗ ᐱᓕᒻᒪᒃᕈᑎᐅᒋᔭᖅᑐᓂᒃ ᐊᑑᖃᖅᑐᑦ ᐃᓄᖕᓄᑦ.
ᖃᐃᒋᑦᓰ! ᑐᑭᓯᒋᐊᕈᑎᒃᓴᖅ ᐊᑑᑎᑦᑎᐊᕙᐅᕗᖅ ᐃᓕᓐᐊᓂᖅᑎᓄᑦ, ᐃᓕᓴᐃᔨᓄᑦ ᐊᒻᒪᓗ ᐱᓕᒻᒪᒃᓴᐃᔨᓄᑦ, ᐊᒻᒪᓗ ᐃᓄᐃᑦ ᐱᔪᒪᔭᖃᕋᔭᖅᑐᑦ ᐃᓄᐃᑦ ᐃᓕᓐᓂᐊᖅᑎᑕᐅᓂᖏᓐᓄᑦ.
ᖃᐃᒋᑦᓯ! ᐃᓗᓕᖃᖅᐳᖅ:
- ᑐᑭᓯᒋᐊᕈᑎᒃᓴᓂᒃ ᐱᓕᒻᒪᒃᓴᐃᔾᔪᑎᒃᓴᐅᒐᔭᖅᑐᓂᒃ ᐅᑭᐅᖅᑕᖅᑐᒥ ᐊᒻᒪᓗ ᖃᓪᓗᓈᖤ ᓯᓚᑦᑐᖅᓴᕐᕕᖕᓂ ᐃᓕᓐᓂᐊᕐᕕᔾᔪᐊᒻᒪᕆᓐᓂᓗ ᓄᓇᓕᐸᐅᔭᓃᑦᑐᓂ ᐃᓄᖕᓄᑦ ᖃᐅᔨᒪᔭᐅᔪᓂᑦ, ᓲᕐᓗ ᐃᐊᑦᒪᓐᑕᓐ ᐅᕝᕙᓘᓐᓃᑦ ᐋᑐᕚ;
- ᑎᑎᕋᖅᓯᒪᔪᑦ ᖃᓄᐃᓕᐅᕈᑕᐅᒃᑲᓐᓂᕆᐊᖃᖅᑐᑦ ᐃᓕᓐᓂᐊᒐᒃᓴᐃᑦ ᐃᓯᕋᓱᐊᕐᓗᓂ ᐊᑐᓂ ᐃᓗᓯᕐᒧᑦ ᐊᒃᑐᐊᓂᖃᖅᑐᓂᒃ ᐱᓇᓱᐊᖅᑕᐅᔪᓄᑦ. ᑖᓐᓇ ᐃᑲᔪᕐᓂᖃᕋᔭᖅᐳᖅ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᖅᑎᓄᑦ ᓈᒻᒪᒃᑐᓂᒃ ᐃᓕᓐᓂᐊᒐᒃᓴᓂᒃ ᐃᓕᓐᓂᐊᓕᕋᓗᐊᕐᒪᖔᑕ ᐃᓯᕈᓐᓇᖁᓪᓗᒋᑦ ᐃᓕᓐᓂᐊᒐᒃᓴᐅᔪᒧᑦ ᓂᕈᐊᕆᔭᖏᓐᓂᒃ;
- ᑐᑭᓯᒋᐊᕈᑎᒃᓴᑦ ᐱᔾᔪᑎᖃᖅᑐᑦ ᐸᐃᕆᕕᖕᓂᒃ, ᐃᒡᓗᐃᑦ ᐊᑐᐃᓐᓇᐅᔪᑦ (ᐊᑐᓂ ᐃᓗᐊᓂ ᐊᒻᒪᓗ ᓯᓚᑖᖤ ᐃᓕᓴᕐᕖᑦ), ᐊᒻᒪᓗ ᐊᔾᔨᐅᖏᑦᑐᑦ ᐱᔨᑦᑎᕋᕈᑎᑦ ᑕᒪᒃᑯᐊ ᐊᑐᐃᓐᓇᐅᑐᐃᓐᓇᕆᐊᓖᑦ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᓄᑦ.
ᐃᓗᓯᕐᒧᑦ ᐊᒃᑐᐊᖓᓂᖅᑐᑦ ᐃᓕᓐᓂᐊᖅᑕᐅᔭᕆᐊᓖᑦ
ᐃᓚᓕᐅᑎᓗᒍ ᖃᐃᒋᑦᓯ! ᑐᑭᓯᒋᐊᕈᑎᒃᓴᒧᑦ, ᐊᔪᙱᓂᖅ ᓴᖅᑭᑦᑎᓯᒪᕗᖅ ᐅᖃᐅᓯᒃᓴᓕᐅᕈᑦ ᑎᑎᖅᑲᒥᒃ ᖃᓪᓗᓈᑎᑑᖓᓪᓗᓂ, What Sculpture is to Soapstone, Education is to the Soul: Building the Capacity of Inuit in the Health Field.
ᐸᐃᑉᐹᖅ ᐱᓕᕆᐊᖃᖅᐳᖅ ᐱᓗᐊᖅᑐᒥᒃ ᐃᓗᓯᕐᒧᑦ ᐊᒃᑐᐊᓂᖃᖅᑐᓂᒃ ᐃᓕᓐᐊᓂᖅᑕᐅᔭᕆᐊᓖᑦ ᐃᓄᖕᓂᑦ ᓯᑕᒪᑦ ᐊᕕᒃᑐᖅᓯᒪᓂᐊᓃᑦᑐᓂ. ᐱᒻᒪᕆᐅᓂᖃᖅᑎᑦᑎᕗᖅ ᐃᓚᖏᓐᓂᒃ ᐊᔾᔨᐅᖏᑦᑐᑦ ᐱᒡᒐᕐᓇᕈᑎᒋᔭᐅᕙᒃᑐᑦ ᐃᓄᖕᓂᑦ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᕋᓱᐊᓕᕌᖓᒥᒃ ᐊᒻᒪᓗ ᓯᓚᑦᑐᖅᓴᕐᕕᖕᓂ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓕᓐᓂᐊᖅᑎᑕᐅᑎᓪᓗᒋᑦ.
ᐊᔪᙱᓂᖅ ᐃᑲᔪᕈᑎᒃᓴᖏᑦ ᐋᓐᓂᐊᖃᕐᓇᖏᑦᑐᓕᕆᓂᕐᒥ ᐃᖅᑲᓇᐃᔮᒃᓴᓄᑦ:
[1^]Ajunnginiq Centre. What Sculpture is to Soapstone, Education is to the Soul: Building the Capacity of Inuit in the Health Field. 2004.
